DILI, 10 maiu 2024 (TATOLI)–Diretór Eskola Ensinu Sekundária Tékniku Vokasionál Indústria no Teknolojia (ESTVIT) 28 Novembru iha Becora, Manuel Amaral, husu ba Ministériu Edukasaun (ME) atu aselera define modelu uniforme eskolár, tanba to’o agora estudante tinan letivu foun laiha uniforme eskolár.
“Uniforme eskolár ne’e to’o agora ita seidauk prodús tanba desizaun husi Ministériu Edukasaun katak labele prodús ka haruka estudante sira suku lai farda foun hodi hein desizaun foun husi Governu ba modelu farda ida de’it ba eskola sira iha territóriu tomak.
Tanba ne’e mak ami la haruka estudante foun sira suku farda ne’e. Kleur loos ona, entaun ita husu ba Ministériu Edukasaun atu aselera lalais ona tanba estudante foun sira to’o agora laiha uniforme,” Diretór Eskola hateten iha ninia knaar fatin, Becora, sesta ne’e.
Notísia relevante : Eskola iha territóriu sei asesu modelu uniforme eskolár iha maiu
Nia konsidera ME foti desizaun tarde ba uniforme nune’e eskola sira la uniforme no prodesór sira susar identifika bainhira estudante sira iha problema ruma.
Aleinde ne’e, eskola sira ezije atu aselera uniforme eskolár tanba atu tama fali ona ba períodu daruak maibé estudante foun sira mai ho farda anteriór sira.
“Ita hein desizaun husi Ministériu Edukasaun mak foin bele implementa, maibé to’o agora ita hein no tama ona ba períodu daruak ona mós ita-nia oan sira nafatin mai ho farda husi eskola anteriór nia, uza faru mutin, entaun sira ketak loos ho estudante tuan sira ne’ebé iha nanis ona farda molok Ministériu Edukasaun hasai sirkular,” nia akresenta.
Estudante foun diferente ho estudante seluk
Nune’e mós, Estudante Eskola 28 Novembru, Augusto Pereira, husu ME haree asuntu uniforme eskolár ne’e tanba dezde estudante foun sira tama laiha farda to’o agora.
“Ami tama ba areadór eskola ne’e ho farda modelu oin-oin de’it tanba ami ho faru mutin no ami-nia bin maun sira tuan ne’e uza farda ida antes iha ne’e, entaun ita ketak-ketak loos iha areadór eskola nia. Ita husu Ministériu Edukasaun atu haree ba asuntu ne’e tanba dalaruma mós estudante foun husi eskola seluk tau hotu faru mutin, ne’ebé dalaruma sira seluk mak halo problema mós ema deskonfia dehan ami hotu tanba ami ho estudante husi eskola seluk ne’e uza faru mutin hanesan de’it,” nia dehan.
Totál estudante husi Eskola 28 Novembru hamutuk 518 ho profesór 37.
Hatan ba kestaun ne’e, Diretór Jerál Ensinu Sekundáriu Jerál ME, Deolindo da Cruz, hateten, Gabinete Apoiu Jurídiku sei haree hela rekomendasaun husi Prezidénsia Konsellu Ministru (PCM, sigla portugés) kona-ba uniforme eskolár nia, hafoin haree hotu rekomendasaun hirak ne’e hafoin lori fali ba PCM atu halo diskusaun no foti desizaun.
“Ita sei haree no hadi’a lai rekomendasaun balun husi PCM, depoizde ida-ne’e maka ita lori filafali ba atu halo diskusaun. Sei lori fali ba depois parte apoiu jurídiku haree tan lai tanba ita kuandu kria dekretu-lei ruma ne’e ita haree hotu ba nia vantajen no dezvantajen liga ho Ministériu seluk ho setór seluk hotu,” nia tenik.
Jornalista : Osória Marques
Editora : Julia Chatarina
