DILI, 23 abríl 2024 (TATOLI)–Portavós Gabinete Ministra Edukasaun (ME), Filipe Rodrigues, hateten eskola sira iha territóriu nasionál sei asesu modelu uniforme eskolár iha fulan-maiu 2024.
Notisia Relevante: ME submete ona diploma ministeriál kona-ba uniforme eskolár ba PCM
“Kona-ba tipu farda sei lahatodan inan-aman sira, entaun Ministériu Edukasaun sei avansa ho tipu ida. Iha tempu Indonézia nian, eskola sira uza farda tipu tolu. Ida-ne’e hatodan inan-aman tanba keta iha balun ne’ebé oan barak mak eskola entaun difísil mós ba ida-ne’e, nune’e Ministériu Edukasaun deside ho tipu ida de’it. Família ne’ebé hakarak suku rua ka tolu hodi troka malu ne´ebele, maibé Ministériu Edukasaun nafatin ho tipu ida,” Filipe hateten ba Agência Tatoli, iha nia kna’ar fatin, Vila Verde, tersa ne’e.
Nia dehan, Ministériu Edukasaun labele promote katak sei utiliza unoforme eskolár iha segundu trimestre ne’e, tanba prosesu ne’e presiza tempu liuhusi halo sensibilizasaun ba eskola sira hotu iha territóriu.
“Ita labele dehan atu uza iha trimestre daruak tanba iha inísiu fulan-maiu mak ministra aprova. Ita mós presiza halo sensibilizasaun ba eskola sira, ne’e presiza mós tempu. Kuandu aprova no ita sensibiliza mak sei fila-fali ba kada eskola ida-idak. Eskola ne’ebé lalais mak nia sei utiliza uluk, ne’e depende fali ba kada eskola nian,” nia dehan.
Tuir nia, Ministériu Edukasaun (ME) liuhosi Ministra Edukasaun, Dulce de Jesus, sei aprova no ekipa sei tun halo sensibilizasaun ba diploma ministeriál uniforme eskolár nian ba eskola sira iha territóriu.
“Ligadu ho uniforme eskolár ne’e Ministériu Edukasaun prepara ona diploma ministeriál ne’ebé koordena ona ho Prezidénsia Konsellu Ministru, nune’e atu dehan tarde liu ne’e iha inísiu fulan-maiu ne´e. Ministra Edukasaun aprova ona depois ita halo sensibilizasaun ba diploma ministeriál ne’e ba eskola bainhira implementa,” nia hateten.
Iha fatin seluk, Adjuntu Diretór Eskola Sekundáriu Jerál 4 Setembru UNAMET, Balide Alexandre da Costa, hateten dadaun ne’e eskola ne´e seidauk iha uniforme ba estudante anu letivu 2024, tanba desizaun husi Ministériu Edukasaun seidauk hatun ba iha eskola sira atu suku farda ba estudante sira.
“Uniforme eskolár ne’e até agora seidauk iha informasaun, la’ós eskola mak kansela uniforme ba estudante foun sira maibé ME mak kansela dehan sira fó modelu mak deside atu suku. Tanba ne’e mak ami sei hein desizaun husi ME bainhira mak sira bele hatun despaixu ida mai, para oinsá estudante sira-ne’e bele utiliza uniforme ona. Ne’ebé, ami hein de’it desizaun husi superir sira iha leten,” nia dehan.
Tanba ne´e, nia parte rekomenda ba Ministériu Edukasaun atu aselera lalais desizaun kona-bá uniforme ba estudante sira, nune’e bele fasilita di’ak liután hodi identifika estudante sira bainhira halo problema ruma iha li’ur.
“Rekomendasaun ba Ministériu Edukasaun mak oinsá bele hatun lalais desizaun ida para estudante sira uza uniforme ne’e para fasil ita bele kontola no identifika estudante sira. Ne’ebé, espera sira bele toma atensaun ba ida-ne’e. Ita dehan aselera ne’e para evita difikuldade ne’ebé ami hasoru hanesan defísil ba ami atu kontrola kuandu labarik sira lauza farda halo problema iha li’ur ne’e. Hanesan akontese foin lalais, estudante eskola 4 Setembru UNAMET Balide ho eskola Nobel da Paz ne’e, susar atu ita identifika, tanba estudante anu letivu 2024 ne’e farda la ha,” nia hateten.
Jornalista : Osória Marques
Editór : Cancio Ximenes
