Caitlin enkoraja jornalista timoroan konkore ba programa bolsa estudu husi ABCID
DILI, 06 Novembru 2026 (TATOLI)—Embaixadora Austrália ba Timor-Leste, Caitlin Wilson, enkoraja jornalista timoroan sira iha Timor-Leste atu konkore ba programa bolsa estudu husi Australian Broadcasting Corporation International Development (ABCID).
Nia hatutan, kona-ba apoiu Austrália ba dezenvolvimentu jornalizmu no mídia nian, entaun nia mós hakarak fó parabéns ba jornalista sira tanba ABCID bele loke bolsa estudu ba jornalista timoroan sira iha tinan ida-ne’e.
“Relasiona ho apoiu Austrália ba jornalizmu liuhusi kooperasaun ho ABC International Development, ami sente orgullu boot tanba bele fó apoiu ba dezenvolvimentu kontinua kona-ba kapasidade no koñesimentu profisionál iha setór mídia,” Embaixadora ne’e relata ba jornalista sira iha Palásiu Governu, ohin.
Apoiu ne’e la’ós de’it liuhusi parseria ho RTTL no TATOLI maibé mós liuhusi inisiativa ida-ne’ebé sira anúnsia iha tinan kotuk, mak lansamentu programa bolsa estudu anuál ba jornalista joven na’in-rua, atu sira bele aplika ba treinamentu no mentoria iha Austrália, hafoin sira fila mai Timor-Leste atu kontinua implementa iha sira-nia servisu.
“Ha’u hatene katak bainhira ami hasoru malu antes no depois imi partisipa iha programa bolsa estudu ne’e, ita bele haree katak ne’e sai esperiénsia ida-ne’ebé di’ak tebes ba imi,” nia subliña.
Tanba programa ne’e ajuda dezenvolve no hametin tan talentu ne’ebé sira haree iha jornalista sira, talentu ne’ebé presiza kontinua hetan apoiu no dezenvolvimentu.
Aspetu ida-ne’ebé Austrália fiar tebes, nu’udar nasaun demokrátika ida mak independénsia no liberdade mídia, no mós importánsia atu kontinua hasa’e kapasidade jornalista sira-nian liuliu iha área jornalizmu investigativu.
“Ha’u hakarak hato’o konvite públiku ba jornalista hotu atu haree no lee informasaun kona-ba prosesu kandidatura, no submete imi-nia aplikasaun.
Ami sente kontente no haksolok atu fó apoiu ba benefisiáriu bolsa estudu na’in rua ne’ebé sei hili iha tinan oin mai,” nia dehan.
Rekerimentu no prosesu rejistu
ABC International Development esplika katak programa bolsa-estudu ne’e loke ba jornalista hotu-hotu ne’ebé iha nasionalidade Timor-Leste, ho idade menus husi tinan 35 no ativu hamosu servisu jornalista iha lian Tetum, Portugés ka Inglés.
Kandidatu sira tenke submete proposta ba reportagem ka ideia ba matéria (story pitch) ne’ebé aborda asuntu interese públiku no iha impaktu direta ba moris komunidade iha Timor-Leste.
Proposta ne’e tenke esplika tanbasá asuntu ne’ebé hili importante, métodu no abordajen ne’ebé sei uza iha prosesu reportagem, no mós planu atu públika ka transmite rezultadu husi servisu jornalista ne’e.
ABC International Development enfatiza katak proposta reportajen mak parte importante liu iha prosesu selesaun. Tanba ne’e, kandidatu sira sei aprezenta ideia ne’ebé klaru, relevante no iha valór jornalístiku ne’ebé forte.
Aleinde proposta reportagen, kandidatu sira mós tenke aprezenta dokumentu tuirmai:
Kurríkulu Vitae (CV) ka istória kona-ba edukasaun no esperiénsia servisu;
Hatán pergunta kona-ba komprensaun no importánsia husi jornalizmu interese públiku;
Karta rekomendasaun husi instituisaun komunikasaun sosial ne’ebé kandidatu servisu ba, ka husi editór ka editora ne’ebé antes publika ona kandidatu nia servisu jornalista.
Presiza mós proposta reportagem mós tenke hetan aprovasaun husi xefe redasaun ka editór husi instituisaun komunikasaun sosiál ne’ebé sei publika ka transmite matéria ne’e.
Prosesu rejistu bele realiza online liuhusi formuláriu ofisiál ne’ebé ABC International Development disponibiliza.
Kandidatu sira mós bele download formuláriu rejistu iha versaun lian Inglés ka Tetun, preenxe liuhusi sistema eletróniku ka hakerek diretamente iha formuláriu. Hafoin, entrega dokumentu hotu-hotu ne’ebé kompletu hamutuk ho karta rekomendasaun ba Fernanda Maria, iha edifísiu RTTL.
Jornalista : Alexandra da Costa
Editór : Cancio Ximenes
