VIQUEQUE, 10 maiu 2024 (TATOLI)-Ministru Komersiu Indústri (MKI), Nino Pereira, hamutuk ho autoridade lokál munisípiu Viqueque, sesta ne’e, lansa feira produtu lokál hodi promove ba públiku.
Hafoin ramata lansamentu, Ministru Nino Pereira, hateten, Governu Konstituisionál da-sia liuhusi MKI dezeña konseitu polítika hosi kontribui dezenvolvimentu liuhusi promove produtu lokál sira-ne’ebé iha Timor Leste.
“Tanba ita hatene katak populasaun pursentu 95 (%) moris iha setór agrikultura, Timor Leste iha produtu barak atu transforma sai produtu indústria . Ho ida-ne’e sai hanesan dalan hodi ita bele dezenvolve ekonómoa no dezenvolve ita-nia nasaun Timor Leste. Prinsipal ita hakarak dezenvolve ekonómia, ita hakarak mantein ekonómia, ita hakarak kore povu husi mukit no kiak, ita hakarak kriasaun empregu hirak ne’e maka sai fonte prinsipal”, Governante ne’e afirma.
Nune’e, Feira ne’e hanesan meiu ida atu promove produtu sira-ne’ebé mai husi agrikultór sira liman badinas, liman kreativu no matenek hodi kontinua.
“Ho nune’e, ita presiza hakas aan liután, timor-oan tenke hadomi ita-nia produtu no ita presiza tau atensaun extra ba ita-nia produtu. Se ita la hadomi ita-nia produtu, ita ba hadomi ema-nia produtu husi liur, signifika ita mak kontribui ba dezenvolvimentu ekonómia iha ema-nia nasaun, seluk tanba ita sosa ema-nia produtu osan sira-ne’e sei sai fali ba ema-nia nasaun”, nia enkoraja.
Husi eventu feira produtu lokál referidu MKI sei identifika grupu sira hodi reprezenta kada munisípiu partisipa eventu feira nasionál ne’ebé sei realiza loron 15 fulan-Maiu.
Feira produtu lokál ne’e ho objetivu prinsipál ba komemorasaun loron restaurasaun independénsia Timor Leste ba dala 22 iha loron 20-Maiu.
Iha biban ne’e, Sekretáriu munisípiu Viqueque asuntu Dezenvolvimentu, Acacio Sarmento, agradese MKI ne’ebé organiza eventu feira produtu lokál hodi grupu agrikultór sira bele partisipa no promove produtu lokál munisípiu Viqueque nian.
“Ami husu agradese MKI ne’ebé ho fuan boot mai realiza eventu feira iha Viqueque. Tanba liu husi eventu sira-ne’e bele motiva agrikultór sira sai badinas liután prodús produtu lokál”, nia akresenta.
Komandante PNTL munisípiu Viqueque, Superintendente Antonio Rego Fernandes, haktuir destaka ona membru PNTL hodi asegura eventu feira produtu lokál durante loron tolu.
“Nune’e ha’u husu ba abitante sira kolabora ho PNTL hodi ita hamutuk asegura eventu ida-ne’e la’o susesu iha ita-nia munisípiu liuliu kontribui ba pás no establidade”, nia apela.
Enkuatu feira produtu lokál ne’e hetan partisipa husi grupu hamutuk 46, kompostu husi grupu tais 10, hahan tradisionál 9, instituisaun rua, insaiu tolu, artezenatu ida, pintura ida, grupu oman 8, grupu faan haat, telekomunikasaun rua, grupu siro ida, grupu mina nuu no mina virjen hamutuk haat.
Iha serimónia abertura ne’e hetan partisipa husi diretór munisípiu Viqueque, autoridade lokál, veteranu, sosiadade sivil, ekipa MKI no partsipa másimu husi abitante postu Viqueque Vila.
Entretantu eventu feira produtu lokál ne’e organiza husi MKI no hetan kolaborasaun ho autoride munisípiu Viqueque durante loron tolu ne’ebé hahú sesta ne’e no sei ramata domingu.
Jornalista: Vitorino Lopes da Costa
Editór : Florêncio Miranda Ximenes
