iklan

MUNISÍPIU, VIQUEQUE

Laiha materiál, konstrusaun UNP unidade sia iha Bahatata paradu durante fulan-rua

Laiha materiál, konstrusaun UNP unidade sia iha Bahatata paradu durante fulan-rua

Konstrusaun UNP unidade sia iha suku Bahatata-Uatucarbau  paradu fulan-rua resin ona. Imajén Tatoli/Vitorino Lopes da Costa

VIQUEQUE, 10 maiu 2024 (TATOLI)- Xefe suku Bahatata, Postu Administratrivu Uatucarbau, Munisípiu Viqueque, Patricio Maria Pinto, informa prosesu konstrusaun Uma Naroman ba Povu (UNP) unidade sia, ne’ebé implementa iha tinan 2023, suku Bahatata, paradu durante fulan-rua resin ona tanba kondisaun estrada aat difikulta empreza halo distribuisaun materiál sira hanesan semente no rai-henek.

“Kondisaun estrada liga bá ami-nia suku aat, nune’e ita-nia fornesedór sira labele distibui rai-henek no semente hodi finaliza konstrusaun uma UNP regular. Progresu Konstrusuan atinje ba pursentu 75 no uma hitu atinje 80%, tanba maioria kalen taka hotu ona, maibé balun reboka mak seidauk no balun dapur mak seidauk”, Patricio Maria Pinto, hateten ba Agência Tatoli, via telefónika, ohin.

Uma unidade sia ne’ebé daudaun ne’e paradu partense ba aldeia Uaimare, Nelu-Uai no aldeia Tatadere no kada aldeia hetan uma unidade tolu.

Materiál  kontrusaun hanesan rai-henek tula iha postu Uatucarbau, balun tula iha baliza Bagia no Laga maka lori mai ami-nia suku hodi halo konstrusaun ba  UNP.

“Ha’u ko’alia ona ho badaen lokál sira no empreza sira katak bainhira udan para sira komesa tula ona materiál konstrusaun atubele halais konstrusaun ba uma hirak ne’e,” nia garante.

Governu alokasaun orsamentu iha tinan 2023 ba UNP iha suku Bahatata ho kada uma ida gastu $17.000. Uma ne’ebé konstrui kompostu hosi tipu ka medida rua hanesan, tipu 48 m2 iha kuartu tolu, sala vizita ida no dapur.

Objetivu Konstrusaun UNP atu korresponde ba Planu Estratéjiku Dezenvolvimentu Nasional (PEDN) 2011-2030, ne’ebé rekoñese povu Timor-Leste nia aspirasaun atu harii nasaun ne’ebé forte, prosperu no moris di’ak.

Jornalista: Vitorino Lopes da Costa
Editór    : Florencio Miranda Ximenes

iklan
iklan

Leave a Reply

iklan
error: Content is protected !!