DILI, 10 maiu 2024 (TATOLI)–Sekretaria Estadu Kooperativa (SEKoop), sesta ne’e, asina nota akordu ho parseiru Movimentu Kamponéz Timor-Leste (MOKATIL) hodi oferese subvensaun ho montante $535.500, hodi bele implementa programa kamponéz.
Diretór Jerál Kooperativa, Olderico Lopes, esplika, atividade ohin nu’udar programa SEKoop ne’ebé iha tama iha orsamentu tinan ne’e, iha rúbrika transefénsia públika nian. Aleinde ne’e, iha ona planu atu oferese subvensaun ba parseiru kooperativa sira, liu-liu sira-ne’ebé harii ona kooperativa ho nia estrutura kompletu bele asesu ba orsamentu liuhusi transferénsia públika.
“Nota akordu ohin ne’e nu’udar dahuluk ita asina ho parseiru MOKATIL hodi fó subvensaun $535.500 hodi implementa ba nia programa no planu sira, ne’ebé tuir prosedimentu fó uluk 40% lai, hafoin hala’o atividade no submete relatóriu mak fó tan 60%,” Diretór informa ba Agência Tatoli, iha salaun SEKoop, Akait.
Notísia relevante : MOKATIL husu Governu kria lei própriu ba kooperativa
Iha fatin hanesan, Prezidente Nasionál MOKATIL, Hélio Dias da Silva, hateten, subvensaun ne’e hodi halo preparsaun ba apoiu produtu lokál ba programa merenda eskolár nian iha terretóriu laran.
“Ita lansa uluk ona fornesimentu merenda eskolár ne’e iha munisípiu Manufahi ho totál totál eskola hamutuk 16, ho benefisiáriu estudante hamutuk 16.300 no iha tempu badak ita asina tan nota akordu entre Ministériu Edukasaun, SEKoop no Prezidente Auroridade Munisípiu hotu hodi halo fornesimentu merenda eskolár ba eskola sira,” nia tenik.
MOKATIL distribui produtu hanesan na’an, koto, modo, vitamina, ai-fuan no seluk tan ba programa merenda eskolár.
Estudante hamutuk 430.000 iha territóriu tomak mak sai benefisiáriu husi programa nasionál merenda eskolár.
Membru MOKATIL halo atividade hanesan ortikultura, veternária, pekuária, inklui halo prosesamentu no distribuisaun ba merkadu sira.
Produtu lokál ne’ebé membru movimentu ne’e prodús mak hanesan hare, batar, koto, fore-mungu no produtu lokál seluk tan.
MOKATIL rasik daudaun iha membru hamutuk 137.600, ne’ebé espalla iha territóriu tomak.
SEKoop nia orsamentu ba tinan 2024 hamutuk 5.162.599, kompostu husi saláriu no vensimentu 1.883.897, bens no servisu korrente 1.894.937, transferénsia públika 1.109.065, kapitál menór 274.700 no kapitál dezenvolvimentu laiha.
Jornalista : Arminda Fonseca
Editora : Julia Chatarina
