iklan

AINARO, HEADLINE

Edukasaun Ainaro presiza profesór na’in-52 hodi reforsa prosesu ensinu-aprendizajen

Edukasaun Ainaro presiza profesór na’in-52 hodi reforsa prosesu ensinu-aprendizajen

Prosesu aprendijazen iha eskola E.B.F 1.2 Hutseo, Suku Leolima, Postu Administrativu Hato-Udo, Munisípiu Ainaro. Iha loron kuarta (11/05). Imajen Tatoli/Francisco Sony

DILI, 12 Maiu 2024 (TATOLI) – Edukasaun Ainaro presiza profesór na’in-52 hodi koloka iha eskola sira, liuliu iha postu administrativu Maubisse atu apoia prosesu ensinu-aprendizajen, informa Diretór Edukasaun Munisípiu Ainaro, Patrício da Costa Magno.

“Ami horisehik submete ona relatóriu mai Edukasaun no ami presiza profesór na’in-52 hodi hanorin iha pré-eskolár no ensinu báziku sira iha Ainaro”, Patrício Magno dehan ba Tatoli, via telefone.

Ainaro iha postu haat, maibé Maubisse mak presiza tebes manorin, tanba depoizde sirkulár husi Ministériu Edukasaun sai hodi hapara profesór kontratadu maka sira enfrenta hela falta rekursu umanu.

“Ami iha Ainaro, liuliu iha postu administrativu Maubisse nian rekursu menus, tanba eskola ida dalaruma iha de’it profesór na’in-rua, balun tolu. Tanba ne’e, aproveita ho bolsa kandidatu ne’e”, nia dehan.

Dirijente ne’e salienta katak bainhira Ministériu Edukasaun halo kolokasaun ba monorin sira maka ba de’it iha postu Maubisse, tanba iha Hatu-Udu, Hatubuiliku ne’e sufisiente hela.

“Iha postu Maubisse pré-eskolár, ensinu báziku primeiru, segundu no terseiru siklu presiza duni profesór no haree ba manorin balun ho idade avansada mós barak ona. Sira-nia kondisaun fízika ne’e la merese atu hanorin estudante sira”, nia relata.

Ho falta manorin iha eskola sira iha Maubisse maka Patrício Magno sei ko’alia ho rekursu umanu Ministériu Edukasaun para koloka profesór 52, hodi hanorin iha eskola filiál sira iha área remota. “Ami enkontru iha semana kotuk no lista ami submete ona ba Ministériu Edukasaun, depois ita hein ninia rezultadu”, nia espera.

Totál eskola bazika no filiál iha Ainaro hamutuk 93, ho ninia estudante 18.808 – pré-eskolár 47 ho nia alunu 2.136, sekundáriu lima no iha estudante 3.324, no tékniku vokasionál haat no nia estudante 517.

Jornalista: Osória Marques

Editora: Maria Auxiliadora

iklan
iklan

Leave a Reply

iklan
error: Content is protected !!