COVALIMA, 13 Maiu 2024 (TATOLI) – Servisu Edukasaun Munisípiu Covalima lansa Programa Merenda Eskolár tinan 2024 iha Eskola Bázika Sentrál (EBC) Suai Loro.
“Ohin, ita hahú hala’o lansamentu ba implementasaun merenda eskolár iha Covalima, tanba ekipa jestaun programa (EJP) ho responsabilidade serbisu hamutuk ho diretór eskola no profesór sira”, Xefe Departamentu Jestaun Programa Edukasaun, Gregório Ferreira Afonso, hato’o iha EBC Suai Loro, ohin.
Programa Merenda Eskolár implementa iha eskola 148 ho totál alunu hamutuk 17.804 ne’ebé alunu husi pré-eskolár iha 1.878 no ensinu báziku sentrál iha 16.017.
Tuir loloos Covalima implementa merenda eskolár iha loron efetivu 181, maibé tanba kestaun orsamentu tarde no foin sai iha Marsu 2024, tanba ne’e foin mak implementa ba loron efetivu 136 hodi fó prióridade ba produtu lokál no labele sosa produtu importadu.
Alokasaun orsamentu ba merenda eskolár iha 2024 hamutuk $1,016.964,48, ne’ebé kada estudante iha direitu han sentavu 0,42 hahú iha loron segunda to’o sesta.
Menú ai-han ba implementasaun Programa Merenda Eskolár presiza fó alimentasaun ne’ebé haforsa, haburas no proteína hodi kompleta malu.
Reprezentante Prezidente Autoridade Covalima, Alberto Moniz de Araújo, reforsa katak Edukasaun Covalima deside EBC Suai Loro mak sai alvu ba lansamentu programa ne’e.
“Ita-boot sira hatene, iha Orsamentu Jerál Estadu ba munisípiu Covalima aloka boot ba Programa Merenda Eskolár, nune’e diretór, koordenadór eskola sira no Ekipa Jestaun programa ezekuta orsamentu ho responsabilidade no fó han ba alunu sira tuir menú”, dehan.
Objetivu implementa programa ne’e atu atrai alunu sira-nia partisipasaun iha sala-de-aula no aumenta sira-nia matenek hodi lori rai ne’e ba oin, tanba estudante mak sai hanesan futuru ba nasaun.
Autoridade ne’e mós apela ba Ekipa Jestaun Programa pesiza jere didi’ak osan, nune’e labele devolve ba kofre Estadu no osan ne’e bele benefisia alunu sira.
Bazeia ba esperénsia hatudu katak implementasaun Programa Merenda Eskolár iha 2023, Covalima devolve orsamentu hamutuk $167.114,65 ba kofre Estadu.
Jornalista: Celestina Teles
Editora: Maria Auxiliadora
