Ekipa Presidensiál sensibiliza ona dokumentu fraternidade umana
DILI, 13 maiu 2024 (TATOLI) – Prezidente Repúblika, José Ramos Horta, orienta ona ekipa Presidensiál atu sensibiliza implementa polítika kona-ba dokumentasaun Fraternidade Umana ba iha munisípiu sira, ho tema “Ontem Era Uma Paixão, Hoje é Uma Compaixão, Amanhã Será Uma Kultura de Encontro”.
Dokumentu Fraternidade Umana ne’e, asina husi Sua Santidade Papa Francisco no Imam boot, Al-Ahzhar Ahmad Al-Tayyeb, iha abu-dabhi, iha loron 04, fulan-fevereiru, tinan 2019.
“Ita-nia Xefe Estadu Ramos Horta, molok kandidatu aan ba Prezidente Repúblika hetan konvite sai juri iha Abu Dabi kona-ba sensibilizasaun Fraternidade umana”, dehan Asesór Nuno Horta liuhusi komunikadu ne’ebé Agência TATOLI asesu husi media Palásiu Prezidensiál, segunda ne’e.
Nia dehan, durante juri iha Abu Dabhi Xefe Estadu eleitu ba Prezidente RDTL, hahú ko’alia ho Parlamentu Nasionál hodi implementa dokumentu ne’e, iha territóriu Nasionál.
Nune’e Parlamentu hasai resolusaun númeru 11/2022, hodi aprova ho votus unanimidade iha 13/05/2022, no iha 19/09/2022 Prezidente Horta hamutuk ho Governu ho Santa Sé, lansa sentru Fraternidade Umana iha palásiu prezidensiál, tanba ne’e hamutuk ho Asesór Fraternidade Umana, Nuno Horta, ho ekipa sei kontinua sosializa ba iha munisípiu sira hotu iha teritoriu nasionál.
Hahú loron 02-12 Maiu, ekipa asesoria Fraternidade Umana hala’o kampaña no dezaminasaun kona-ba Fraternidade Umana dahuluk, iha Eskola Sekundária Jerál Malere no Ensinu Bazíku Dom-Baumeta Munisípiu Aileu durante loron tolu.
Kontinua babEskola Ensinu Sekundária Jerál Fernando Lasama, Eskola Sekundária Katólika Sta. Maria Ainaro, no mós Ensino Bazíku Venancio Ferraz, Ensinu Bazíku sta.maria, no Ensinu bazíku Fernando Lasama munisípiu Ainaro durante loron tolu. No ikus liu iha Ensinu bazíku Diligência Same, no Ensinu Sekundária Colégio São Miguel Arcanjo (COSAMAR) munisípiu Manufahi.
Durante sensibilizasaun Fraternidade Umana, iha munisípiu Aileu, Ainaro no Manufahi, estudante sira, Diretór/a eskola, inklui mestre balun, kontente no agradese ba Prezidente Repúblika liu husi ekipa Fraternidade Umana, tanba bele fahe ona esperiénsia kona-ba dokumentasaun Fraternidade Umana, no sira rekomenda ba Xefe Estadu, atu aselera kooperasaun ho Ministériu Edukasaun atu nune’e dokumentu ne’e, bele tama kuríkulu edukasaun.
Prezidente Repúblika sei koopera ho Ministériu Edukasaun hodi hatama dokumentu Fraternidade Umana ne’e ba kuríkulu Edukasaun Timor-Leste, tanba liu husi dokumentu ne’e, fó hanoin ita, atu kuidadu ambiente no animal sira, no-mós oinsa kria pás no unidade iha ita-nia sosiedade, liu-liu ba ita-nia rai Timor-Leste.
Tuir Ajenda fulan-juñu nian, Ekipa Fraternidade Umana Prezidénsia Repúblika sei kontinua hala’o kampaña no sosializasaun Fraternidade Umana ba parte Leste.
Notísia relevante:PR Horta nu’udar kampiaun mundiál ba promove valór fraternidade umana
Jornalista: Hortencio Sanchez
Editór: Florencio Miranda Ximenes
