iklan

ELEISAUN, MUNISÍPIU, VIQUEQUE

Helio Ximenes eleitu sai Xefe Suku Builo ho votu 343

Helio Ximenes eleitu sai Xefe Suku Builo ho votu 343

Eleisaun komunitária suku Builo, Ossú kandidatu Xefe Suku Builo Helio Ximenes hetan votu 343. Imajén Tatoli/Vitorino Lopes da Costa

VIQUEQUE, 13 maiu 2024 (TATOLI)-Eleisaun komunitária segunda volta, komunidade  iha suku Builo, Postu Administrativu Ossú, munisípiu Viqueque, fó votu konfiasa ba kandidatu númeru sorteu 01, Helio Ximenes de Fernandes ho votu 343 atu sai Xefe Suku ba periodu 2024-2030.

Komisáriu CNE destakadu munisípiu Viqueque, Olavio da Costa Monteiro Almeida, haktuir, eleisaun segunda volta iha suku Builo kandidatu na’in-rua maka avansa ba segunda volta ne’ebé kandidatu númeru sorteu 01 maka hetan votu maioria.

“Eleisaun ba segunda volta suku Builo sentru votasaun hamutuk haat hahú votasaun tuku 9:00 dader ho ramata tuku 3h00 lokoraik. Hafoin votusaun ita kontinua halo kontajen ba kada sentru votasaun haat ne’e rezultadu eleitór sira Builo fó votu konfiasa ba Helio Ximenes de Fernandes ho votu maioria 343 ka manán ho 67%”, Olavio da Costa Monteiro Almeda, hateten ba jornalista sira hafoin kontajen votu ramata, iha suku Builo, ohin.

Tuir ajenda, aban kontinua halo apuramentu ba rezultadu votasaun husi sentru votasaun haat hamutuk hodi konfere akta referidu, depois sei aprezenta rezultadu definitivu ba postu no sei postu haruka ba Ministériu Administrasaun Estatál (MAE) hodi fó sai rezultadu final eleisaun nian.

Alende ne’e nia dehan, eleisaun komunitária suku Builo hahú dader to’o eleisaun ramata CNE la indetifika aktu irregularidade iha sentru votasaun haat.

“Eleisaun ida-ne’e ami observa la’o hakmatek no ami la rejista irregularidade ruma. Tanba ita-nia abitante sira koopera tebe-tebes ho parte seguransa”, nia aprezenta.

Tuir rezultadu eleisaun komunitária suku Builo ho totál eletór suku Builo hamutuk 805, eletór ne’ebé partisipa votu totál hamutuk 516. Iha kontajén inisiál ba kandidatu númeru sorteiu 01, Helio Ximenes de Fereira hetan votu 343 no kandidatu númeru sorteiu 02 hetan votu 173, votu nulu haat no eletiór la partisipa votasaun 293.

Enkuantu rezultadu kontajen votu kada aldeia haat kompostu husi aldeia Buareka Kandidatu númeru 01, Helio Ximenes de Fereira hetan votu 20, kandidatu númeru sorteu 02, Osorio da Silva hetan votu 36. Aldeia Lutugia kandidatu númeru 01 Helio Ximenes de Fereira hetan votu 40, kandidatu númeru sorteu 02, Osorio da Silva hetan votu 4.

Iha Aldeia Builo mak kandidatu númeru 01, Helio Ximenes de Fereira hetan votu 169, kandidatu númeru sorteiu 02, Osorio da Silva hetan votu 57 no Aldeia Derulo kandidatu númeru 01, Helio Ximenes de Fereira hetan votu 114, kandidatu númeru sorteu 02, Osorio da Silva hetan votu 49.

Jornalista : Vitorino Lopes da Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!