COVALIMA, 13 Maiu 2024 (TATOLI) – Ministériu Administrasaun Estatál (MAE), liuhusi Diresaun-Jerál Toponímia no Organizasaun Urbana halo sensibilizasaun ba dekretu-lei lima ba autoridade sira iha Covalima.
Dekretu-lei ne’e mak númeru 51/2016, primeira alterasaun 31/2017 kona-ba Publisitária, Dekretu-lei 33/2008 sobre Ijiene Orden Públika, Dekretu-lei númeru 12/2014 kona-ba Restrisaun Movimentu Animál iha Área Urbana, Dekretu-lei númeru 11/2014 kona-ba Rejime Identifikasaun Rejistu Sirkulasaun Animál no Dekretu-lei númeru 7/2003 sobre Kódigu Estrada.
“Ami mai tanba simu karta konvite husi autoridade Covalima hodi halo sosializasaun”, Diretór Nasionál Jestaun Ijiene no Orden Públika, Egas José Caetano, dehan iha salaun AMC, ohin.
Divulgasaun dekretu-lei sira ne’e atu hasa’e autoridade Covalima, liña ministeriál no komandante eskuadra sira-nia kõnesimentu, nune’e sira bele entende didi’ak konteúdu husi dekretu-lei atu implementa no fiskaliza iha nivél munisípiu no to’o iha postu administrativu sira.
Atividade sensibilizasaun fó knaar no fó forsa ba autoridade munipál no polisiál atu implementa dekretu-lei hirak ne’e hodi organiza sidade iha Covalima, tanba dekretu-lei sira bandu komunidade konstrui uma iha trotoár leten, bandu komunidade haki’ak animál iha estrada públika, bandu so’e lixu arbiru iha fatin públiku, konstrui uma iha mota-ninin, tasi-ninin, nomós kona-ba fatin domíniu públiku sira.
“Ita atu implementa dekretu-lei ne’e tenke brani no ho fuan. Bainhira merkadu Covalima la organizadu, ita presiza organiza hodi utiliza dekretu-lei hodi fa’an iha fatin ne’ebé serve no konstrui uma iha fatin ne’ebé merese”, nia fo hanoin.
Tuir observasaun ne’ebé diretór ne’e halo, komunidade sira kesi karau iha Polísia no Bombeiro nia edifísiu oin, tanba ne’e presiza atu fó hanoin, nune’e autoridade munisípiu hahú identifika no implementa ona lei.
“Atu halo asaun presiza identifika, sé mak na’in ba karau, sé mak konstrui uma iha trotoár leten, tenke ko’alia ho fuan. Se la koopera, fó notifikasaun hodi hakerek mós baze legál no hakerek ho loron atu hamamuk fatin públiku”, dehan.
Diretora Servisu Munisipál ba Jestaun Merkadu no Turizmu, Teresa Pires, agradese ba diretór nasionál tanba iha disponibilidade hodi sensibiliza dekretu-lei ba autoridade iha Covalima.
“Presiza halo sosializasaun, ita-nia komunidade sira seidauk iha konxiénsia, tanba dalabarak ami taka avizu labele so’e lixu arbiru, maibé sira lees hotu avizu no so’e lixu la tau iha nia fatin no bainhira ami halo jestaun iha merkadu hamosu dezentendimentu”, nia lamenta.
Nune’e, Servisu Munisipál Jestaun Merkadu no Turizmu submete karta ba Ministériu Administrasaun Estatál hodi halo konsulta públika, nune’e bele halo jestaun tuir baze legál ne’ebé vigora ona.
Jornalista: Celestina Teles
Editora:Maria Auxiliadora
