MSSI rejista uma-kain 2.000 vulnerável iha RAEOA sei hetan ajuda umanitária
DILI, 13 maiu 2024 (TATOLI)—Ministériu Solidaridade Sosiál no Inkluzaun (MSSI) rejista ona uma-kain 2.000 ho kondisaun vulnerável iha Rejiaun Administrativa Espesiál Oé-cusse Ambeno (RAEOA) sei hetan ajuda umanitária iha semana ne’e.
“Aban ita sei halo viajen ba RAEOA, semana ne’e nia-laran ita sei halo ajuda umanitária ba uma-kain vulnerável hamutuk 2.000 iha RAEOA,” Diretór Nasionál Asisténsia Sosiál MSSI, Fernando dos Reis, informa iha ninia knaar fatin, Caicoli, segunda ne’e.
MSSI realiza programa ne’e kada tinan tanba iha ona alokasaun orsamentu, liuhusi Diresaun Nasionál Asisténsia Téknika hodi sosa foos no kompleta ho komplementár hanesan susu-ben, manu-tolun no seluk tan hodi fornese ba sidadaun vulnerável sira no aloka ba armazein Sentru Solidaridade Sosiál iha munisípiu sira hodi utiliza bainhira akontese dezastre naturál ruma.
“Ita prevee orsamentu sosa foos $495.000 no aumenta tan orsamentu ba ai-han komplementár nian hamutuk $100.000,” nia akresenta.
Notísia relevante : MSSI sei apoia ai-han ba ema ho defisiénsia 582 iha Oé-Cusse
Husi orsamentu ne’e, sosa foos hamutuk saka 28.000 (korverte ba tonelada 7,7) ne’ebé atribui ba munisípiu tomak.
MSSI hahú ona ajuda umanitária iha fulan kotuk, hahú husi Ataúro ho totál benefisiáriu 1.500, ne’ebé kompostu husi ferik-katuas, ema ho defisiénsia, feto faluk no oan ki’ak sira ne’ebé laiha kondisaun atu sustenta sira-nia moris loron-loron.
Asaun solidariedade ne’e rasik hala’o iha loron 06 to’o 11 abríl 2024 hodi distribui foos saka 1.000 inklui ai-han komplementár 1.000 ba aldeia 19 husi suku lima iha Ataúro tomak no ajuda ba RAEOA nian agora no horiseik haruka foos saku 2.000, sei kompleta ho ai-han komplementár sira.
Jornalista : Arminda Fonseca
Editora : Julia Chatarina
