Dewi Fortuna hasoru PM Xanana ko’alia amizade TL-Indonézia
DILI, 14 maiu 2024 (TATOLI) – Akademista no peskizadora ho naran Dewi Fortuna Anwar, hamutuk ho nia kolega na’in-rua mai hosi ajénsia ho naran Badan Riset dan Inovasi Nasional (BRIN) iha Jakarta Indonézia, hasoru-malu ho Primeiru-Ministru (PM), Kay Rala Xanana Gusmão, hodi ko’alia kona-bá relasaun amizade entre Timor-Leste (TL) ho Indonézia no amizade iha organizasaun rejionál Association of Southeast Asian Nations (ASEAN).
“Durante enkontru ami ko’alia buat barak kona-bá relasaun Indonézia ho Timor-Leste, ko’alia mós kona-bá ASEAN oinsá hahú fali relasaun amizade iha futuru,” Dewi Fortuna Anwar hateten hafoin enkontru ho Primeiru-Ministru iha palásiu Governu, tersa ne’e.
Primeiru-Ministru mós hakarak atu hametin amizade iha ASEAN nia laran no iha enkontru ne’e Dewi Fortuna Anwar mós husu kona-bá oinsá preparasaun Timor-Leste atu bele sai membru permanente ASEAN nian.
“Xanana hateten, tuir loloos ne’e todan oitoan tanba bainhira sai ona membru permanente, Timor-Leste tenke partisipa enkontru oioin nível ASEAN nian to’o 1000-resin kada tinan. Ida-ne’e la fásil bá Timor-Leste tanba presiza rekursu ne’ebé mak boot inklui rekursu umanu no fasilidade sira. Tanba ne’e, Xanana dehan, buat hotu-hotu sei iha limitasaun, nune’e Timor-Leste tenke hili ida ne’ebé mak prioridade liu no la’ós enkontru hotu-hotu tenke tuir,” nia hateten.
Akademista no peskizadora ne’e iha espreransa katak, esforsu no papél Timor-Leste hanesan nasaun progressivu, bele haforsa liután espíritu demokrásia iha ASEAN nia laran, liuliu kona-bá asuntu direitu umanu no seluk tán.
Nia fó ezemplu katak, oras-ne’e daudaun ASEAN enfrenta hela situasaun difísil ida iha Myanmar, no konsidera ASEAN sei konservativu hela, maibé iha esperansa katak, bele hetan inspirasaun hosi Timor-Leste nu’udár nasaun progressivu ne’ebé sei lori ambiente foun perante situasaun ne’e.
Objetivu loloos hosi prezensa Dewi Fortuna Anwar iha Timor-Leste tanba hetan konvite hosi Prezidente Repúblika (PR), José Ramos-Horta, atubele fó hela Presidential Lecture ka Palestra Prezidensiál kona-bá Regional Security and Regional diplomacy iha Palásiu Prezidensiál iha loron 16 Maiu tinan ne’e no nia rasik sei simu kondekorasaun hosi Estadu Timor-Leste.
Daudaun Akademista no peskizadora ho nia maluk na’in-rua ne’e hala’o hela peskiza kona-bá papél feto TL iha luta libertasaun durante tempu rezisténsia no mós papél feto iha promosaun pás no dezenvolvimentu nasionál.
Dewi Fortuna Anwar koñese ona Primeiru-Ministru Kay Rala Xanana Gusmao kleur ona desde sei servisu iha Prezidente Repúblika Indonézia (RI), Bacharuddin Jusuf Habibie nia ukun.
Jornalista: Hortencio Sanchez
Editór: Florencio Miranda Ximenes
