EBC Haenaudere enfrenta problema menus profesór

VIQUEQUE, 14 maiu 2024 (TATOLI)- Diretór Ensinu Báziku Central Haenaudere (ABC,sigla Portugés) iha munisipiu Viqueque, Aquilis Martins, husu Governu liuhusi Ministériu Edukasaun (ME) aselera prosesu rekretutamentu profesór tanba daudaun ne’e menus profesór hodi hanorin estudante sira.

“Daudaun, ami enfrenta menus profesór hahú husi kontratu profesór sira-nia hotu iha dezembru 2023.  Nune’e ami   to’o agora seidauk aloka profesór ba ami-nia eskola. Tanba ne’e, ami husu ba Ministériu Edukasaun atu aselara ona prosesu rekretamentu hodi koloka ba eskola sira hodi hanorin ita-nia estudante sira. Sé prosesu kle’ur estudante sira maka sai vitima ba prosesu apredijazen”, Aqulis Martins, hateten ba Agência Tatoli, via telefónika, ohin.

Ho difikuldade ne’e, nia dehan, daudaun esforsu hela hala’o normaliza hodi  aumeta matéria no oras ka oráriu ba profesór atubele lori materia rua hodi kobre ba filiál sira.

Iha EBF Osokaiua kada profesór lori ona matéria rua hanesan lian portugés, lian tetun, matemátika, siénsia naturál, siénsia sosiál, edukasaun sívika, arte no kultura, inklui relijiaun.

“Problema ida-ne’e sériu ne’ebé ministériu tenke rezolve lalais, nune’e ita-nia estudante sira labele sai  vitima,  espera ministériu bele aselera prosesu rekrutamentu hodi koloka profesór mai ami-nia eskola”, nia sujere.

Eskola Ensinu Baziku Sentral (EBC) 09 Haenaudere, ne’ebe lokáliza iha área rurál, postu administrativu Uatulari, munisipiu Viqueque.

Tuir dadús EBC Haenaudere  ho  ninia filiál tolu, EBC Haenaudere iha profesór  na‘in-11 ho totál estudante hamutuk 416, kompostu hosi pré-eskolár husi klase 1 to’o 9 ano iha profesór permanente na‘in-10.

Enkuantu,  EBF Nululi ho totál estudante na’in-216 no profesór permanete na’in-neen, EBF Osokaiua profesór na’in-rua, estudante na’in-33 no EBF Uaibira totál estudante na‘in-100 kompostu hosi klase 1 to’o 7 ano no profesor permanente na in-haat.

Jornalista: Vitorino Lopes da Costa

Editór    : Florencio Miranda Ximenes