Kargu Xefia 2500 mak seidauk presta rikusoin iha CAC

DILI, 13 maiu 2024 (TATOLI) – Diretór Inspesaun no Monitorizasaun no Responsavel Deklarsaun Rendimentu Bens no Interese, Komisaun Anti-Korrupsaun (CAC, sigla portugés) Antoninho Alves da Cruz, dehan CAC rejista, iha tinan 2024, kargu xefia hamutuk 2.500 mak seidauk presta sira-nia deklarasaun rikusoin.

Nia subliña, hafoin lei númeru 7/2020, 26 agostu kona-ba Medida Prevensaun no Komabte Korupsaun tama iha aplikasaun iha tinan 2022, CAC halo kedan servisu hodi halo arrolamentu no rejistu. Hosi arrolamentu ne’ebé CAC halo ba institituisaun Estadu ne’e to’o agora instituisaun Estadu hamutuk 109.

“Hosi instituisaun Estadu ne’ebé iha, ba kargu xefia ne’ebé mak presta sira-nia Deklarsaun Bens no Interese ba CAC iha 2024 hamutuk ema 2.322, hosi númeru ne’e kompostu hosi kargu xefia ne’ebé antes ne’e no sira ne’ebé mak foin simu pose. Enkuantu ba kargu xefia ne’ebé seidauk presta sira-nia Deklarsaun Bens no Interese iha 2024 iha ema 2.500”, Antoninho Alves hateten ba jornalista sira iha nia kna’ar fatin Matadoro, segunda ne’e.

Nia mensiona, tuir dadus iha 2022, ba kargu xefia ne’ebé mak presta ona sira-nia rikusoin iha CAC hamutuk 6.218 no ba kargu xefia sira ne’ebé mak seidauk presta sira-nia Deklarasaun Bens no Interese iha 2022 iha ema 1540.

Tuir dadus iha 2023, kargu xefia ne’ebé mak presta ona sira-nia rikusoin iha CAC hamutuk ema 2.182 mak rejistradu ona iha baze dadus CAC nian no kargu xefia ne’ebé mak seidauk presta sira-nia rikusoin iha CAC iha 2023 hamutuk 1.000.

“Hosi instituisaun Estadu 109 ne’ebé mak iha kargu xefia barak mak ita ekivale ba pursentu karik ha’u bele dehan pursentu 50 mak aprezenta ona sira-nia rikusoin ba CAC no pursentu 50 mak seidauk aprezenta sira-nia rikusoin ba CAC to’o agora”, nia adianta.

Antoninho hateten, Prezidente Autoridade foun sira ne’ebé foin simu pose mós kuaze hothotu seidauk aprezenta sira-nia Deklarsaun Bens no Interese ba CAC to’o agora tanba balun dehan presiza notifikasaun hosi CAC no balun mai ho razaun katak Komisáriu laiha to’o hein komisáriu iha mak sira foin mai aprezenta.

Maibé normalmente, tuir lei númeru 7/2020, 26 agostu kona-ba Medida Prevensaun no Komabte Korupsaun, artigu 48 hateten kuandu kargu xefia ida mak aprezenta sira-nia deklarasaun bens no interese ba CAC la presiza hein Komisáriu CAC maibé ho konsiénsia no lei ne’e hateten ba kargu xefia ne’ebé mak antes simu pose ona tenke aprezenta ninian deklarasaun bens no interese ho anualmente no ba kargu xefia ne’ebé mak foin simu pose iha loron hitu nia laran, nia rekursu umanu tenke aprezenta lista iha CAC atu iha loron tolu 30 nia laran hakarak ka lakohi tenke presta deklarasaun bens no interese ba CAC.

“To’o agora iha institusaun barak, liuliu kargu xefia barak mak viola lei ida-ne’e dezde 2022 to’o barak mak seidauk aprezenta sira-nia deklarasaun bens no interese ba CAC tanba ho razaun katak CAC presiza notifika sira no laiha komisáriu”, nia akresenta.

Antoninho afirma, CAC sei fó  sansaun ba kargu xefia sira ne’ebé to’o agora seidauk presta sira-nia rikusoin ba CAC tanba aprezenta rikusoin ne’e obrigatóriu.

“Kuandu liu prazu mak CAC sei notifika ba kargu Xefia ne’ebé mak lakohi aprezenta ninian deklarasaun bens no interese, kuandu liu mak CAC konsidera infrasaun no infratór sira CAC sei kua nia osan hosi saláriu báziku mensal 25% tuir lei MPCC haruka no ida ne’ebé dezde hosi lei MPCC ne’e entra en-vigór mak nia la aprezenta Deklarasaun Bens no Interese to’o agora sei kua nia saláriu báziku mensál 30% tuir lei MPCC haruka”, nia haktuir.

Nia dehan, maske Komisáriu CAC seidauk iha maibé CAC agora daudaun arrola hela dadus kargu xefia ne’ebé seidauk presta Deklarasaun Bens no Interese ba CAC, haree hela hodi aplika sansaun ka koima ba sira.

“Ami agora daudaun arrola hela dadus ba kargu xefia ne’ebé seidauk presta Deklarasaun Bens no Interese ba CAC, ami sei hato’o iha relatóriu ida kuandu Komisáriu CAC foun mai ami hato’o ba nia hodi aplika koima tuir lei ne’ebé mak iha ona”, nia konklui.

Jornalista :Natalino Costa

Editór : Zezito Silva