MJDAC-Federasaun Boxing Timor-Leste prosede kampionatu nasionál
DILI, 14 maiu 2024 (TATOLI) – Ministériu Juventude Desportu Arte Kultura (MDJAC) hamutuk ho Federasaun Boxing Timor-Leste realiza eventu kampionatu nasionál boxing atu buka joven talentozu sira ne’ebé hakarak mete iha boxing, hodi prepara sira ba tuir eventu internasionál.
Ministériu Juventude Desportu Arte Kultura Nélyo Isaac Sarmento, hateten MJDAC hamutuk ho Federasaun Boxing Timor-Leste, iha tinan ne’e, realiza eventu kampionatu nasionál ba boxing dala rua, ida halo iha maiu hodi komemora loron restauransaun independénsia no ida seluk sei halao iha fulan-Agostu.
“Ida maiu ne’e ba klase seniór to’o junior, enkuantu eventu kampionatu boxing nasionál ne’ebé sei halao iha fulan-Agostu ne’e ba klase semi-profisionál. Ida-ne’e hanesan meius ida ne’ebé ita prepara ekipa nasionál ne’ebé ita sei joga iha Sea Games tinan oin”, Nelyo Isaac dehan iha abertura ba jogu kampionatu nasionál boxing hodi komemora restauransaun independénsia ba dala-22.
Governante ne’e adianta, ba eventu kampionatu boxing nasionál ne’ebé sei halo iha agostu, sei partisipa hosi Prezidente Repúblika no eventu ne’e Prezidente Repúblika sei konvida Manny Pacquioa atu mai asiste eventu ne’e liuhosi Pacquiao promotion.
“Ita tenke aproveita ida-ne’e, ita haree, karik ho eventu sira hanesan ne’e bele dudu ita-nia ema ida ka rua ne’ebé mak sai boxing profisionál, ida-ne’e mak meius ida ne’ebé Governu halo hodi buka bibit petinju liuliu boxing timoroan ninian, ita bo’ot sira hatene ne’e hanesan segundu modalidade desportiva ne’ebé prestizu ne’ebé koñesidu iha iha Timor-Leste no eventu sira hanesan ne’e sei kontinua nafatin ba oin”, nia adianta.
Governante ne’e louva no apresia dezenvolvimentu boxing iha Timor-Leste tanba ema sira ne’ebé tur iha Federasaun Boxing ne’e, ema ne’ebé mak iha kapasidade atu dezenvolve boxing iha Timor-Leste ho di’ak liu tanba ema sira ne’e mai ho background boxista de’it, ne’ebé hatudu prestasaun di’ak iha tempu Indonézia.
“Governu liuhosi atividade sira henesan atu bele haree joven sira-nia talentu sira. Atu prepara joven ne’ebé iha modalidade desportu boxing nian hodi tuir kompetisaun iha li’ur. Ha’u sempre apoiu totalmente ba modalidade desportiva hothotu kuandu modalidade desportu ne’ebé organiza di’ak Governu la taka matan Governu ba apoiu”, nia akresenta.
Prezidente Komisaun Organizadora ba kampionatu nasionál boxing, João Euguénio hateten, Governu liuhosi MJDAC apoiu osan $20 mil ba federasaun boxing Timor-Leste hodi realiza eventu kampionatu boxing nasionál tinan ne’e.
“Atividade ohin ne’e hanesan abertura ba iha kampionatu nasionál boxing hodi komemora loron restauransaun independénsia 20 maiu ba dala- 22, maibé hanesan ohin ministru koalia ona iha nia intervesaun katak ita sei la halo to’o iha ne’e maibé eventu kampionatu nasionál sei halao mós iha fulan-agostu tinan atu ita bele prepra ita-nia joven sira atu halo selesaun ba joven ne’ebé iha talentu duni ba boxing bele haruka sira ba liur hodi partisispa kompetisaun Sea Games iha tinan oin”, nia dehan.
Nia dehan, kampionatu nasionál ne’e hahú iha 13 maiu 2024 to’o termina iha 20 maiu no abertura ba boxing ida-ne’e iha ema 32.
“Prémiu ba eventu ida-ne’e, komisaun sei diskute ho federasaun sira ne’ebé mak hetan primeiru lugar, segundu lugar no terseiru no sira ne’ebé lahetan mós sei hetan prezente tanba ami sei diskute saida mak atu fó ba sira”, nia informa.
Euguénio hateten, kampionatu nasionál boxing ne’e fahe ba kategoria rua, iha klase juniór no seniór, iha klase juniór iha 166, enkuantu iha klase seniór iha ema 31. No sira ne’ebé atu kompete nia kilo tenke 48, 54 kilograma, 57 kilograma 60, 61 kilograma no 63,5 kilograma liu kritériu ida-ne’e labele.
Iha klube boxing hamutuk 23 no asososiasaun boxing hosi munisípiu ualu, kompostu hosi Ermera, Baucau Ainaro Manufahi, Manatutu, Lautem no RAEOA mak partisipa iha eventu ne’e.
Jornalista :Natalino Costa
Editór : Zezito Silva
