iklan

EKONOMIA, HEADLINE

Falta bee, natar ektare 1.323 iha Liquicá la utiliza

Falta bee, natar ektare 1.323 iha Liquicá la utiliza

Kondisaun irrigasaun ne’ebé abandonadu tinan barak ona, iha suku Ossuala, sábadu (16/10). Imajen TATOLI/Nelson de Sousa

DILI, 15 Maiu 2024 (TATOLI) – Diresaun Servisu Agrikultura Munisípiu Liquiçá rejista rai ektare 1.323 la utiliza hodi kuda hare, tanba fornesimentu bee ba natar la sufisiente.

Diretór Servisu Agrikultura Liquiçá, José Pereira de Jesus, relata katak munisípiu ne’e iha rai potensiál ektare 1.703, maibé foin maka uza de’it ektare 380 hodi kuda hare.

“Rai produtivu ektare 1.323 ne’ebé abandona hela ne’e lokaliza iha suku Faulara [ektare 600] no Lisadila [723]. Rai sira ne’e abandona tanba fornesimentu bee mak la to’o”, José de Jesus hateten iha Comoro, ohin.

Tanba ne’e, dirijente ne’e husu ba Ministériu Agrikultura atu halo intervensaun imediata hodi hadi’a irrigasaun, nune’e bele fó biban ba komunidade agrikultór sira halai mós natar ba époka daruak nian no ba tinan oin.

Tuir nia, problema irrigasaun mak sai dezafiu boot ba natar-na’in sira tanba bee husi mota Lauleli ninia volume ki’ik liu. Tanba ne’e, labele kobre ba to’o natar 1.323 ne’ebé abandona hela no nia husu atu tinan oin kuandu governu tau ona planu hadi’a irrigasaun tenke tau mós planu halo irrigasaun foun iha Liquiçá.

“Tanba ho irrigasaun de’it maka bele tulun komunidade agrikultór sira hodi garante sira-nia produsaun natar iha Liquiçá bele aumenta no bele apoiu mós programa Governu nian atu hasa’e produsaun rai-laran hodi redús importasaun foos”, dehan.

Ba natar ektare 380 ne’ebé funsiona hela ne’e foin maka kuda hare iha Abríl no tuir planu sei kolleta entre Juñu no Jullu. Iha tinan ida ne’e agrikultór sira bele produs hare époka dahuluk de’it no ba tinan oin maka sei aselera nia produsaun.

Notísia relevante:  Natar ektare 200 iha Salele abandonadu

Jornalista: Tomé Amado  

Editora: Maria Auxiliadora

iklan
iklan

Leave a Reply

iklan
error: Content is protected !!