OÉ-CUSSE 14 maiu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), tersa ne’e abertura feira livru iha monumentu Lifau, ho objetivu atu hasa’e no abitua kultura lee hodi promove literasia, nune’e bele hatene situasaun hodi transforma idea inisiativa, tanba lee bele hatene no oinsá bele muda.
“Feira livru ne’e, sinál atu enkoraja estudante, inan-aman, manorin sira no ema hotu, bele abitua ho lee, tanba lee ita bele promove ona ita-nia literasia no sai kultura mai ita hotu, nune’e bele apoia prosesu aprendizajen di’ak, tanba liuhusi lee ita bele hatene buat hotu, liuhusi lee ita bele komprende siénsia no lee hanesan janela ba mundu,” Sekretária Rejionál ba Asuntu Edukasaun no Solidariedade Sosiál, Inácia Tamele, ko’alia iha monumentu Lifau.
Notísia relevante: Autoridade RAEOA aloka rihun $37 komemora 20 Maiu ho desportu komunitária
Inácia Tamele, informa, feira ne’e importante, estudante sira iha eskola 17, husi ensinu sekundáriu tolu (3), EBC haat (4) no EBF, ho totál estudante 500-resin mak partisipa ativu atu mai aprende no lee iha feira livru ne’e.
“Ida-ne’e hafanun ami atu loke biblioteka, iha ami-nia Planu Asaun Anuál (PAA), ami mós prioridade atu harii biblioteka, tanba iha planu lisaun sira hotu, bainhira to’o iha ezersísiu, iha parte ida, estudante sira tenke vizita biblioteka, tán ne’e mak biblioteka importante iha RAEOA, bele enkoraja manorin sira atu mai halo peskiza atu hadi’a ita-nia jestaun, hakbiit abilidade ita tenke lee barak mak foin ita bele hatene saida mak ita-nia kna’ar ho loloos,” nia fó hanoin.
Vise-Prezidente Komisaun Organizadora, Agustinho Caet, hateten, feira livru ne’e, realiza atu komemora loron restaurasaun independénsia ba dala-22, tanba iha loron 17 to’o 18 maiu ne’e, Autoriddae konvida autór prinsipál sira, konfirmadu ona, Primeiru Ministru no Lere Anan Timur.
“Maun boot Xanana sei mai, iha loron 18 atu konta istória saida mak loron restaurasaun 20 maiu, konta ba estudante sira nu’udar jerasaun kontinuadór, no iha loron 17 maiu, líder istóriku, Lere Anan Timur, mai atu konta nia istória ba prosesu luta ukun rasik-an no konvida mós veteranu sira iha Oé-Cusse.”
Tuir nia, feira livru ne’e, efetivu tebes foin mak hahú iha Oé-Cusse, no sei kontinua realiza kada tinan, atu enkoraja estudante sira atu hahú ona abitua-aan atu lee, tanba tuir filozofia, livru ne’e nu’udar jenela ba iha mundu.
Notísia relevante: Sai eskritór, importante lee barak – Luís Cardoso
Entretantu, hola parte iha espozisaun feira livru ne’e, husi Sentru Nasionál Chega (CNC), Arkivu Muzeu Rezisténsia Timoresnse (AMRT), Mary Mackillop Today, Fundasaun Alola, Sala Leitura Xanana Gusmão, CARE Hatutan, Plan Internasionál, Sentru Amigável ba Labarik no Grupu Movimentu Letra.
Jornalista: Abílio Elo Nini
Editór: Evaristo Soares Martins
