DILI, 15 maiu 2024 (TATOLI) – Ministériu Komérsiu no Indústria (MCI), halo ona abertura ba feira produtu nasionál iha Portu Dili hodi komemora loron restaurasaun indepedénsia 20 maiu ba-dala 22.
“Tema sentrál ba ita-nia komemorasaun ida-ne’e mak hametin instituisaun Estadu hodi servi povu, baziea ba ida-ne’e, koordenasaun servisu ne’ebé mak la’o hosi leten to’o mai kraik hosi ita-nia prezidente autoridade munisípiu sira, ita konsege organiza feira iha nivel munisípiu sira ne’ebé la’o ho hakmatek iha territóriu tomak”, Ministru Komérsiu no Indústria, Filipus Nino Pereira, informa bainhira halo abertura ba feira produtu naisonál iha Portu Dili, ohin.
Nia subliña, Governu konsege identifika produtu pontensiál hamutuk 21 ne’ebé mak sirkula hela iha Timor-Leste, tantu merkadu lokál no mós iha merkadu nasionál.
“Ita orgullu tebes hili feira ida-ne’e mak ita konsege identifika produtu pontensiál hamutuk 21 ne’ebé mak sirkula hela iha ita-nia merkadu tantu merkadu lokál no mós iha merkadu nasionál hanesan bee minerál, cooking oil, sabaun, iha masin, foos lokál, iha cha herbal, iha rebuxadu sukaer no ailia, xhokolate, iha suriso lokál iha mobiliáriu kafee uut, mina marungi, mina aloe verra, mina kamii, tais no asesoria sira, banin been orgániku, tua lokál orgániku, entaun produtu hirak ne’e mak sirkula iha ita-nia rain no prodús hosi ita-nia grupu potensiál sira no mós grupu produtivu sira mikro pequenas empreza sira”, nia afirma.
Nia esplika, liuhosi feira ida-ne’e hodi kontribui atu hametin movimentu ekonomia iha baze ne’ebé fó impkatu ba sosiál, ekonómiku ba sosiedade sira iha munisípiu sira, hahú hosi produsaun, distribuisaun, asesu ba merkadu no mós ba promosaun nian.
“Tanba ne’e mak MCI komprometidu liuhosi feira ida-ne’e mak tempu ona atu iha plataforma ida atu fó espasu ne’ebé mak boot liután ba ita-nia produtu potensiál sira, atu bele iha rekoñesimentu boot liután bele hetan tan merkadu barak ne’ebé mak iha, se ita ko’alia kona-ba espanda merkadu laos ona iha nivel lokál no nasionál, maibé ba ona iha merkadu internasionál tanba ne’e mak ita presiza duni iha espasu ida”, nia haktuir.
Iha fatin hanesan, Primeiru-Ministru Kay Rala Xanana Gusmão, hateten inisiativa feira ida-ne’e hola parte ba selebrasaun komemorasaun 20 maiu ba dala 22 iha Timor-Leste.
“Inisiativa feira ida-ne’e sai fatór sira importante tebes ba ita hotu, ne’ebé selebra no komemora20 maiu ba-dala 22 iha ita-nia rain”, Xanana konklui.
Jornalista : Felicidade Ximenes
Editór : Zezito Silva
