VIQUEQUE, 15 maiu 2024 (TATOLI)- Prezidente Autoridade Munisípiu (PAM) Viqueque, Francisco Cruz S.de G Soares, husu responsavél Ekipa Jestaun Progarama (EJP) ba implementasaun programa merenda eskolár tau antensaun ba kualidade ai-han ne’ebé fornese ba estudante.
“Kontratu ba implementa programa merenda eskolár ba tinan 2024, ha’u husu responsabilidade atu implementa programa merenda eskolár ba eskola 18 atu garante kualidade ai-han ba estudante sira ”, Francisco Cruz S.de G Soares, hateten iha serimónia selebra kontratu ho EJP, ohin.
Lidér maximu munisípiu Viqueque ne’e fó hanoin ba implementadór sira atu respeita matadalan programa merenda eskolár.
“Ha’u espera ba parte hotu atu respeita matadalan hodi implementa programa ida-ne’e, tuir ho responsabilidade no tau importansia ba kualidade hahan, trata estudante sira ho dignu. Tanba akontese iha fatin seluk implementasaun programa merenda eskolár latuir matadalan, nune’e ha’u husu atu iha Viqueque labele akontese”, nia enkoraja.
Iha fatin hanesan, Diretór Servisu Edukasaun Munisípiu Viqueque, Júlio Sacadura, kompremente katak inspetor Servisu Edukasaun ho Ekipa Jestaun Progarama (EJP) sei halo kontrola ba grupu atu implementa ho responsabilidade hodi garante kualidade ai-han ba estudante sira.
“Orsamentu ne’ebé aloka ba merenda eskolár hodi benefísia ba ita-nia oan sira, atu sira bele estuda ho di’ak. ba grupu sira sei implementa programa ida-ne’e la’o tuir matadalan”, Julio hateten.
Tuir planu programa merenda eskolár ne’ebé implementa iha munisípiu Viqueque sei implementa iha inisiu fulan Maiu 2024 ho duransaun efetivu loron 135, iha implementasaun ne’e estudante ida sei benifísia sentavu 0,42 .
Nune’e dadús estudante benifisiariu ba programa merenda eskolár ho totál 22,028, kompostu hosi Ensinu Báziku Sentrál (EBC, sigla portugés) 19,711, Ensinu Báziku Filiál na’in-2,307, Hosi eskola EBC totál hamutuk 18 no EBF totál hamutuk 77 husi dadús ne’e inklui mós eskola katólika ne’ebé eziste iha munisípiu Viqueque.
Enkuantu, programa merenda eskolár ne’e Autoridade munisípiu Viqueque aloka orsamentu totál hamutuk $1,7248,420 ne’ebé aloka ba EBC $1,117613 no aloka ba EBF $130,807.
Kapasita ona EJP
Servisu Edukasaun Munisípiu Viqueque, hahú oferese ona formasaun kona-ba prosesu implementasaun programa merenda eskolár ba Ensin Báziku Sentrál (EBC, sigla portugés) 18 inklui filiál 77 iha munisípiu Viqueque.
Bazia ba Dekretu-Lei númeru 61/2022, kona-ba implementasaun programa merendar eskolár nian ne’e iha tinan 2023 servisu edukasaun munisípiu Viqueque fó ona formasaun ba Ekipa jestaun programa (EJP) merenda eskolár, maibé iha implementasaun la’o ladun di’ak. Tanba ne’e ba tinan ida-ne’e atu implementa kontinua fó formasaun ba implementadór programa referidu.
“Ohin, ami fó formasaun ba implementadór sira liuliu EJP hodi hasa’e sira-nia koñesementu oinsa atu jere programa merenda eskolár ho di’ak”, Reprezentante Servisu Edukasaun Munisípiu Viqueque, Domingos da Costa Soares.
Kalendáriu ba programa merenda eskolár loloos implementa iha loron 2 Maiu 2024, maibé halo alterasaun hodi muda ba loron 13 Maiu mos konsege lansa tanba orsamentu mak seidauk transfere ba konta bankaria EJP.
“Ha’u sente tinan ida-ne’e ita-nia implementasaun ba programa merenda eskolár tarde tanba liga mós ba formasaun estrutura autoridade munisípiu Viqueque nian. Hafoin ezekusaun orsamentu mós tarde iha implementsaun programa ida-ne’e. Fiar katak ho formasaun sira-ne’e ita-nia implementadór sira sei implementa di’ak”, nia hato’o.
Jornalista : Vitorino Lopes da Costa
Editór : Florencio Miranda Ximenes
