iklan

BOBONARO, MUNISÍPIU

CNE-Autoridade Bobonaro diskute futuru preparasaun hasoru eleisaun kámara munisipál

CNE-Autoridade Bobonaro diskute futuru preparasaun hasoru eleisaun kámara munisipál

Prezidente CNE, José da Costa Belo, akompaña husi Vise Prezidente CNE, halo enkontru ho Segundu Sekretáriu Autoridade Munisipál Bobonaro, Semedo Laco. Imajen Tatoli/Sérgio da Cruz.

BOBONARO, 16 maiu 2024 (TATOLI)-Prezidente Komisaun Nasionál Eleisaun (CNE sigla Portugues), José da Costa Belo, kinta ne’e halo enkontru ho segundu Sekretáriu Autoridade Munisipál Bobonaro, Semedo Laco, hodi diskute kooperasaun serbisu no preparasaun atu hasoru eleisaun kámara munisipál iha futuru.

Enkontru ne’e foka liu ba programa edukasaun sívika ho objetivu atu eduka no konvense komunidade hotu partisipa eleisaun kámara munisipál la’o ho di’ak no sesesu.

Alende ne’e CNE mós rona hanoin husi autoridade munisipál Bobonaro kona-ba mudansa no lei sira iha eleisaun prezidensiál, parlamentár no eleisaun suku.

“Atu nune’e CNE bele iha biban, hato’o ba komisaun A no governu atu hadi’a kualidade ba eleisaun nia, tanba ita hatene katak eleisaun munisipál ita seidauk iha, deputadu ba kámara nia mós ita seidauk iha, maibé ne’e importante tanba oinsá podér sentrál bele fahe oituan ba munisipiu bele sente dehan Independénsia sai realidade,” nia ko’alia iha edifísiu admistrasaun munisipál Bobonaro.

Baa futuru, CNE mós sei entrega funsionariu destakadu sira iha estrutura Autoridade Munisipál Bobonaro atu servisu hamutuk hodi serbí ba nasaun liu-liu opiniaun sira oinsá atu dezenvolve demokrasia.

Nia haklaken, kooperasaun servisu ne’e sei kontinua beibeik no espera katak autoridade munisipál Bobonaro bele ajuda CNE ninia ezijénsia sira kona-ba atu alastra tán atividade no apoia fatin dignu ruma, atu halo diskusaun hodi rezolve problema kona-ba eleisaun no disputa sira-ne’ebé akontese iha eleisaun kámara munisipál.

“Ami agradese ba estrutura munisípiu simu ami di’ak,bideia ne’ebé konstrutivu,” nia katak.

Segundu Sekretáriu Autoridade Munisipál Bobonaro, Semedo Laco, hateten enkontru ne’e importante tebes atu nune’e ba futuru bele prepara kondisaun infraestrutura balu no eleva koñesimentu komunidade nia kona-ba eleisaun kámara munisipál.

“Iha tempu besik ita ho ekipa CNE halo sosializasaun kona-ba edukasaun sívika nune’e komunidade sira bele komprende saida mak importante iha eleisaun mai ne’e,” nia hateten.

Notisia Relevante:CNE identifika frakeza balun iha projetu-lei eleitorál munisipál
Jornalista: Sergio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!