VIQUEQUE, 16 maiu 2024 (TATOLI)-Prezidente Autoridade Munisípiu (PAM) Viqueque, Francisco C.S de Gonzaga Soares, husu pesoál saúde munisípiu Viqueque sira atu fó atendimentu ba povu ho profisionalizmu no domin ne’ebé mai husi fuan.
“Ha’u husu ba funsionáriu Saúde sira, atu serbí ema hanesan ema umanu ho profisionalizmu ba atendimentu tuir servisu pesoál saúde nian. Nune’e ha’u fó hanoin ba pesoal saúde sira katak ita servisu ho fuan no laran, hadomi ema hanesan ita-nia an hanesan mós ema selu ida-ne’e sai sai save ba profisionál saúde sira”, Francisco C.S de Gonzaga Soares, hato’o asuntu ne’e iha abetura atividade deziminasaun rejíme kareira ho avaliasaun dezempeña no asina kontratu ba funsionáriu foun pesoál saúde sira, iha salaun serbisu saúde munisípiu Viqueque, ohin.
Viqueque-oan tenke hahú hadi’ak an liu husi ema hotu nia prezensa hanoin buat ida katak mai atu serbì no atu hadi’ak.
“Tempu to’o ona ita-boot (pesoal saúde) sira mai servisu hanesan ema profisionál saúde hodi tau ses problema privadu hodi serbí ema hanesan ema umanu”, nia emkoraja.
Iha fatin hanesan, Diretór Servisu Saúde Munisípiu Viqueque, Aljaksono S. Maia, husu ba pesoál Saúde sira ne’ebé hetan ona oportunidade ba servisu tenke trata pasiente sira ho fuan nomós tenke servisu tuir regra liuliu servisu tuir pontualidade.
“Ba Ita-boot sira ne’ebé hetan ona oportunidade no hola parte ba servidór estadu tenke servisu ho fuan hodi trata ema ho di’ak tanba ita-nia servisu ida ne’e servisu umanidade no servisu tuir regra ho disiplina liuliu pontualidade hodi tama tuir oras sai mós tuir oras” katak nia.
Entretantu, iha asina kontratu ba funsionáriu foun hamutuk neen nulu resin-rua (62) kompostu husi postu lima (5) husi munisípiu Viqueque, iha edifísiu Servisu Munisipál Saúde (SMS).
Iha atividade deziminasaun rejíme kareira ho avaliasaun dezempeña no asina kontratu ba funsionáriu foun ne’e hetan partisipa husi Xefe Departamentu Rekursus Humanus Ministériu Saúde (MS) ho nia ekipa, Xefe Departamentu Servisu Munisipál Saúde (SMS) Viqueque ho ofisiais sira hotu, Xefe sentru saúde hamutuk ho funsionáriu kontratadu sira.
Jornalista :Vitorino Lopes da Costa
Editór :Florencio Miranda Ximenes
