iklan

HEADLINE, POLÍTIKA

Xanana nomeia Agio Pereira sai interlokutór iha diskusaun dezenvolvimentu Greater Sunrise

Xanana nomeia Agio Pereira sai interlokutór iha diskusaun dezenvolvimentu Greater Sunrise

Ministru Prezidénsia Konsellu Ministrus, Agio Pereira. Imajen Tatoli/Egas Cristóvão

DILI, 16 maiu 2024 (TATOLI)- Primeiru-Ministru, Kay Rala Xanana Gusmão, nomeia Ministru Prezidénsia Konsellu Ministru, Hermenegildo Augusto Cabral Pereira “Agio Pereira”, sai hanesan interlokutór iha diskusaun ho Steve Bracks AC nu’udar Reprezentante Espesiál Austrália nian kona-ba dezenvolvimentu Greater Sunrise.

Governu Konstitusionál da-sia ne’e konsidera dezenvolvimentu Greater Sunrise hanesan prioridade estratéjika ida ba Timor-Leste atubele harii baze sira ne’ebé metin ba ekonomia ida ne’ebé sustentável no fó benefísiu ho oportunidade sosiál ba povu timor tomak.

Notisia relevante: PM Xanana husu Woodside respeita interese parseiru ba dezenvolvimentu Greater Sunrise

Tuir nota ne’ebé Agência TATOLI,I.P asesu, kinta ne’e, katak, Ministru Petróleu no Rekursu Minerál, Francisco da Costa Monteiro,mak lidera hela traballu ne’e liuhusi kooperasaun ho ninia omóloga Australiana, Ministra Rekursu Minerál, Madeleine King, tuir kuadru regulamentár ne’ebé estabelese iha Tratadu kona-ba Fronteira Marítima entre Timor-Leste ho Austrália.

Ministru Agio Pereira sei hala’o kna’ar hanesan interlokutór hodi halo diskusaun regulár ho Steve Bracks no sai hanesan kanál ka mata-dalan ba lideransa timor-nian iha Greater Sunrise.

Hili duni Ministru Pereira atu hala’o kna’ar ne’e tanba nia papél hanesan Ajente Timor-Leste nian iha prosesu Konsiliasaun Obrigatória husi Nasaun Unida ne’ebé hamosu Tratadu Fronteira Marítima, no mós nia kompreensaun ne’ebé kle’an tebes kona-ba Sistema polítiku Austrália nian.

Nu’udar interlokutór, Ministru Agio Pereira sei tulun no fasilita komunikasaun, hato’o informasaun no harii entendimentu ne’ebé di’ak entre governu rua hanesan Timor-Leste no Austrália.

Governu Timor-Leste sente laran haksolok ho progresu hirak-ne’ebé halo daudaun ona iha dezenvolvimentu Greater Sunrise no ho nomeasaun interlokutór ida ne’ebé sei dezempeña papél di’ak iha fasilitasaun projetu kritíku ne’e.

Notisia relevante: Esteve Bracks atualiza progresu dezenvolvimentu Greater Sunrise bá PM Xanana

TATOLI

iklan
iklan

Leave a Reply

iklan
error: Content is protected !!