Artista Calema simu hosi ekipa Even2u iha Aeroportu
DILI, 17 maiu 2024 (TATOLI) – Artista Calema to’o Timor-Leste simu hosi ekipa Even2u iha Aeroportu Internasionál Nicolau Lobato Comoro Dili.
Artista Calema to’o iha Aeroportu iha oras 13:45 ho voo Aero Dili ne’ebé simu direta hosi ekipa even2u. Artista Calema ho ekipa mai deskansa iha sala VIP aeroportu no dada lia ho ekipa ANATL no ekipa migrasaun sira hafoin halo entervista ho jornalista sira.
“Ha’u kontente tebes mai iha ne’e, Timor-Leste rai furak tebes, maibé ami mai tempu balun de’it, maibé ami agradese tebes ba simu husi povu Timor tomak laiha dúvida ba ami”, Antonio Mendes Ferreira, informa ba jornalista sira iha Aeroportu Iternasionál Nicolao Lobato, ohin.
Iha fatin hanesan, Fradique Mendes Ferreira, informa katak kontente mai Timor-Leste tanba hetan konvida hosi Even2u atu mai konsertu ba Festival Tasifest tanba ne’e ami kontente hamutuk ho povu Timor-Leste iha 19 maiu, Portu Dili.
“Ami agradese ba Luis Camões ne’ebé organiza tasifest no ohin ami to’o iha Timor-Leste atu bele halo istória hamutuk ho povu Timor sira. Tanba ne’e ami mai aproveita oportunidade atu hatudu ita-boot sira-nia natureza ne’ebé furak. Ita sei hakerek video múzika ida ba ita-nia knanuk foun ida no kontente tebes atu iha Timor-Leste, nu’udar fatin ne’ebé di’ak atu lori vídeo ne’e ba mundu. Mai ita aproveita oportunidade atu la’o hale’u, hatene rai, koko ai-han, ai-fuan no hasoru ema. Tanba ne’e ami sente kontente tebes”, nia konklui.
Jornalista : Felicidade Ximenes
Editór : Zezito Silva
