Komodoro Neves klarifika razaun Austrália seidauk entrega Ró patrollamentu rua
DILI, 17 maiu 2024 (TATOLI) – Komandante Komponente Navál, Komodoro Higinio das Neves, dehan Governu Austrália seidauk entrega ró patrollu rua ho klase protetór ba Timor-Leste tanba fasilidade ró seidauk kompletu, laiha kapasidade finanseira no kestaun kapasidade lojístika.
“Tuir loloos ida ró patrollu ne’ebé Austrália apoiu mai, ita-ne’e serimónia entrega ne’e halo iha Perth, iha 08 maiu, liu ona ba ne’e, maibé tanba iha defisiénsia ki’ik katak ita seidauk iha kapasidade, entaun ró ne’e seidauk bele mai. Entaun Governu rua koordena malu, katak ita seidauk simu depois haree hotu tiha bele ona mak ita foin bele simu. Tanba ne’e mak ita sei hein ne’e”, Komodoro Higinio hateten ba jornalista sira iha nia kna’ar fatin Baze Navál Hera, sesta ne’e.
Neves fó razaun, Governu Timor-Leste seidauk bele simu ró patrollu rua hosi Austrália tanba razaun ida mak fasilidade seidauk kompletu, kestaun daruak mak kapasidade lojístika Timor-Leste seidauk iha no laiha kapasidade finanseiru atu haree ba ró ne’e.
“Fasilidade seidauk kompletu, ita laiha kapasidade lojístika atu suporta no ita iha problema finanseira, entaun sei haree ida-ne’e hotu. Ne’e Governu nia polítika sira-nian, ami komandu iha terenu kumpre de’it polítiku nian desizaun, mas laos dehan lakohi koopera ho Austrália laiha. Ita iha relasaun di’ak liu ho Austrália no ita iha relasaun di’ak ho nasaun sira seluk. Ró só la mai ne’e tanba de’it buat balun ne’ebé ohin ha’u dehan ne’e, iha buat balun ke polítiku sira sei haree, ne’e polítiku mak hatene ne’e oinsá bele haree ida-ne’e”, nia adianta.
Komandante Komponente Navál ne’e mós afirma, Komandu F-FDTL mós deside hodi haruka fila forsa Komponnete Navál ne’ebé antes ne’e prepara ba tuir formasaun kona ka’er ró patrollu ho klase protetór nian.
“Sim, sira hotu fila hotu ona mai iha ne’e, ita bolu fila fali sira hotu mai fali iha ne’e ona no agora sira iha ne’e hotu fali. la signifika ita-nia relasaun ho Austrália, maibé ita kontinua nafatin konsidera Austrália hanesan belun di’ak, ita nafatin iha relasaun ne’ebé di’ak tebes no di’ak liu ho Austrália no mós nasaun sira seluk”, nia konklui.
Jornalista: Natalino Costa
Editór : Zezito Silva
