Komponente Navál salva peskadór 14 iha tasi klaran
DILI, 17 maiu 2024 (TATOLI) – Falintil-Forsa Defeza Timor-Lestes (F-FDL) liuhosi Forsa Komponente Navál salva peskadór timoroan 13 inklui Indonézia ida tasi klaran.
Peskadór hamutuk 14 ne’e sai hosi Hera Bedik ho ró peska ho naran ‘’Sabar Menanti’’ sai hosi Hera iha kinta (16/5) iha oras 23:00 ba peska hodi buka ikan iha tasi, iha área Cruz Mutin Hera nian, maibé bainhira peskadór sira ne’e to’o área refere, sira deskansa no iha sesta (17/5) madrugada sira hahú buka ikan no sira konsege hetan ikan hodi kontinua lao ba tasi área Metinaro nian.
Bainhira to’o iha área Metinaro nian, ró peska ne’e hetan problema no mákina ró ne’e avaria halo ró labele kontinua halo operasaun.
Laloran tasi lori ró ne’e ba fali tasi ibun Manatutu ninian, entaun komunidade sira iha área Metinaro nia mak hetan ró ne’e no informa kedam situasaun ba Komponente Naval no Komandante forsa Fuzileiru Navál na’in-neen ho patrolla nian ba halo kedan salvamentu ba ró no peskadór 14 ne’ebé mak iha ró laran hodi lori mai iha Baze Navál Hera.
Komandante Komponente Navál, Komodoro Higinio das Neves, konta katak iha peskadór na14 mak hetan problema iha tasi laran bainhira sira halo atividade peska iha tasi, iha área Cruz Mutin Hera nian.
Nia dehan, peskadór sira ne’e hamutuk 14 ho ró peska atu halo atividade peska iha area Cruz Mutin nian no derepente ró nia mákina avaria, entaun sira lakonsege atu lao tún no laloran lori sira mai to’o tasi área Manatutu nian. Komunidade sira iha fatin ne’ebá kontatu mai forsa Fuzileiru Navál no ita-nia Fuzileiru sira na’in-neen ho nia Komandante Fuzileiru ba halo salvamentu ba sidadaun sira ne’e.
“Ita ohin simu informasaun iha tuku 9:00 katak ita-nia peskadór sira-nia ró hetan problema iha tasi área Beheda Manantutu nian, entaun ha’u informa situasaun ne’e ba Estadu Maiór no fó ordem ba atu haree asuntu ne’e no ita haruka kedan ita-nia forsa fuzileiru akompaña hosi nia Komandante Fuzileiru ba halo salvamentu ba ita-nia peskadór sira ne’e ita tasi klaran. Agora daudaun ita lori ona sira mai iha ne’e no sira agora asegura ona baze Navál Hera. Sira hamutuk ema 14 hosi, iha ema 13 mak timoroan no ida sidadaun Indonézia, nia ne’e kapitaun ró ne’e”, Komodoro Higinio hateten ba jornalista sira iha nia kna’ar fatin Baze Navál Hera, sesta ne’e.
Komodoro orienta ona ba membru komponente navál atu halo identifikasaun ba ró peska ne’e, ró sosa hosi Surabaya, tanba tuir informasaun katak ró ne’e iha lisensa no ró ne’e nia kapitaun hosi ema Surabaya Indonézia.
“Ita sei halo identifikasaun ba ró ne’e, kuandu iha lisensa, se laiha sira ba rejistu no ita mós sei halo identifikasaun ba kapitaun karik nia iha pasaporte laiha, kuandu laiha pasaporte mak nia halo servisu iha Timor-Leste ita sei deporta nia ba nia rai”, nia informa.
Jornalista: Natalino Costa
Editór : Zezito Silva
