Lere sei komemora loron Restaurasaun Independénsia ho povu Oé-Cusse
OÉ-CUSSE, 17 maiu 2024 (TATOLI) – TenenteJenerál Reformadu, Lere Anan Timur, sei komemora loron Restaurasaun Independénsia 20 Maiu hamutuk ho povu iha Rejiaun Administrativa Espesiál Oé-Cusse Ambeno (RAEOA).
“Ha’u mai vizita ha’u-nia maun boot tanba la hahula nia alin sira, tan ne’e mak ha’u mai Oé-Cusse hakarak komemora 20 maio hamutuk ho ha’u-nia maun no povu iha Oé-Cusse,” Lere Anan Timur, ba jornalista sira hafoin enkontru kortezia ho Prezidente Autoridade RAEOA, Rogério Tiago Lobato, iha Oé-Cusse, sesta ohin.
Notísia relevante: RAEOA kria komisaun lansa Aero Dili iha 19 maiu husi PM Xanana
Lidér istóriku ne’e, afirma, durante iha sorumutu ofisiál ne’e, lidér armada rua ne’e, troka ideia kona-bá planu no dezafiu nu’udar servidór Estadu, atu kontinua rezolve dezafiu sira ho responsabilidade.
“Ohin informa kona-bá situasaun Oé-Cusse ninian kona-bá difikuldade ne’ebé, nia (Rogério Lobato) nu’udar líder ida enfrenta, maibé nu’udar líder sempre ba oin nafatin, ne’ebé ha’u dehan ba maun, katak sempre iha dezafiu ita nu’udar ema, ita sala na’in, hanesan uluk ita funu ne’e, a derrota a minha vitoria, sala mak hahoris ita-nia vitória di’ak nian, ne’ebé maun biar dezafiu maibé iha responsabilidade bo’ot ba vida nasaun no vida povu Oé-Cusse,” nia dehan.
Nia husu ba entidade hotu iha Oé-Cusse atu hamutuk ho autoridade RAEOA, hodi dezenvolve rai Oé-Cusse.
“Nia (Rogério) mai Oé-Cusse la’os hanesan uluk, katak tanba asaun komandu, maibé laiha, nia mai ne’e, dezafiu boot ida ba nia, maibé ha’u hanoin katak, povu Oé-Cusse serbisu hamutuk Autoridade sira, atu dezenvolve rai Oé-Cusse ida-ne’e,” nia apela.
Notísia relevante: Lere husu estudante sira buka hatene istória 20 de Maio
Jornalista: Abílio Elo Nini
Editór: Evaristo Soares Martins
