COVALIMA, HEADLINE

Profesór 218 tama idade reforma no balun moras

Profesór 218 tama idade reforma no balun moras

Diretora Servisu Edukasaun Covalima, Elda de Fátima. Foto/Celestina Teles.

COVALIMA, 17 Maiu 2024 ( TATOLI)  Servisu munisipál Edukasaun Covalima aprezenta ona lista profesór moras permanente no idade reforma hamutuk 218 ba Ministériu Eduksaun (ME).

“Númeru profesór moras permanente na’in-10 husi EBC Zumalai hato’o ona pedidu ba Edukasaun Covalima. Manorin ne’ebé la hato’o pedidu ami konsidera sira hanorin estudante ho oras normál. Prosesu relata dadus profesór ne’ebé moras permanente ba Ministériu Edukasaun ne’e sira husu atu aprezenta tan atestadu médiku kona-ba sira-nia moras, entaun presiza tempu”, Diretora Servisu Edukasaun Covalima, Elda de Fátima, informa ohin.

Tuir dadus, Eskola Bázika Sentrál (EBC, sigla portugés) públiku iha Covalima hamutuk 20 ho nia filiál 74 no totál profesór permanente na’in-686 no manorin ne’ebé tama iha lista ingresu espesiál ne’ebé foin lalais simu ona pose hamutuk 300-resin.

“Ha’u vizita ona EBC públiku 20. Ami taka ona karga orária bazeia ba ha’u simu mensajen foin lalais katak prosesu rekrutamentu profesór husi Covalima na’in-12 de’it mak pasa iha teste, nune’e ami sei koloka profesór tuir nesesidade eskola ba terseiru siklu, profesór ba dixiplina matemátika no inglés sei falta nafatin no presiza kontinua atu halo rekrutamentu iha faze tuirmai”,nia dehan.

Diretór EBC Bulu, José da Silva, reforsa katak Eskola Bázika Centrál Bulu iha lista dadus profesór reforma no moras permanente hamutuk na’in-neen, husi númeru ne’e profesór rua tama iha idade reforma no moras permanente.

“Ami-nia profesór ne’ebé tama lista moras permanente ho idade reforma ne’e ba terseiru siklu ne’ebé hanorin dixiplina jerál, maibé hetan ona kolokasaun manorin na’in-tolu husi Ministériu Edukasaun”, informa.

Eskola Bázika Sentrál Bulu iha estudante 234 ho nia profesór na’in-15 ne’ebé hanorin estudante.

“Foin lalais ne’e Diretora Edukasaun Covalima halo ona kolokasaun profesór hodi taka karga orária”, nia realsa.

Jornalista: Celestina Teles

Editora:Maria Auxiliadora

iklan
iklan

Leave a Reply

iklan
error: Content is protected !!