EKONOMIA, HEADLINE

Saláriu funsionáriu kazuál veterinária na’in-33 nian prosesa ona

Saláriu funsionáriu kazuál veterinária na’in-33 nian prosesa ona

Dólar amerikanu. Imajen/Espesiál

DILI, 17 Maiu 2024 (TATOLI) – Funsionáriu kazuál veterinária na’in-33 husi Ministériu Agrikultura, Pekuária, Peska no Floresta (MAPPF) ne’ebé dezde Janeiru seidauk simu saláriu, parte Diresaun Nasionál Rekursu Umanu prosesa ona hodi halo pagamentu.

Xefe Departamentu Diresaun Nasionál Veterinária, Ercília Pinto Martins, haktuir katak saláriu funsionáriu kazuál iha diresaun veterinária nian ne’e kuaze fulan lima, entre Janeiru no Maiu, ne’e seidauk simu.

“Ita-nia funsionáriu kazuál na’in-33 durante ne’e hala’o sira-nia serbisu hodi apoiu programa vasinasaun ba animál sira ne’e auguenta de’it ho fundu operasionál ne’ebé aloka ba programa vasinasaun ne’e”, Ercília Martins dehan iha Comoro, ohin.

Xefe departamentu ne’e haktuir katak kontratu ne’e realiza kedan iha Janeiru, maibé tanba difikuldade ho sistema sira ne’ebé la’o iha Ministériu Agrikultura nia laran ne’e maka halo pagamentu sira adianta to’o ohin loron.

“Tanba ne’e mak sira na’in-33 ninia atividade atu apoiu programa vasinasaun iha munisípiu sira mós redús no diresaun deside atividade iha munisípiu tolu para provizoriamente, tanba númeru vasinasaun ba moras raiva mós aas ona”, nia esplika.

Nia salienta katak Diresaun Veterinária simu ona informasaun husi Rekursu Umanu ministériu nian ne’ebé husu ona ba funsionáriu kazuál sira ne’e atu submete sira-nia dokumentu sira hanesan billete identidade, sertidaun RDTL no kartaun eleitorál, nune’e prosesa ona saláriu.

Nune’e mós Diretór Rekursu Umanu MAPPF, Hipólito da Costa, informa nia parte simu ona dokumentu funsionáriu kazuál na’in-33 nian husi Diresaun Nasionál Veterinária no iha tempu besik submete ba parte Finansa ministériu nian hodi halo pagamentu.

“Dokumentu ne’ebé ita submete ona ba Finansa ne’e hahú kedan husi fulan-Janeiru to’o Maiu. Agora, ninia prosesu pagamentu ne’e makasei responsabiliza iha Finansa ministériu nian”, realsa.
Ministru Agrikultura, Pekuária, Peska no Floresta, Marcos da Cruz, katak konsidera servisu veterinária ne’e laiha problema, tanba durante ne’e sira hala’o hela serbisu di’ak hodi fó asisténsia ba animál sira ne’ebé hetan moras.

“Hanesan moras raiva, depois mai tan vírus ASF [African Swine Fever] ne’ebé ataka fahi sira no hahú mate iha Manufahi no Liquiçá, inklui moras ba karau sira, kuaze ekipa téknika sira kontinua halo sira-nia serbisu ho responsabilidade hodi halo nafatin vasinasaun”, dehan.

Governante ne’e dehan ministériu kontinua tau atensaun ba tékniku sira-nia nesesidade, liuliu kontratu atu sira bele hala’o serbisu ho di’ak liu.

“Ita hahú ona halo kontratu ho sira iha Janeiru. Ita la hapara sira no nafatin serbisu to’o ohin loron, ne’ebé laiha problema ho ekipa téknika profisionál sira iha Diresaun Veterinária nian”, ministru garante.

Notísia relevante: Vasinasaun antirrábika iha munisípiu rua no RAEOA suspende provizoriamente

Jornalista: Tomé Amado
Editora: Maria Auxiliadora

iklan
iklan

Leave a Reply

iklan
error: Content is protected !!