DILI, 18 maiu 2024 (TATOLI) – Klube identíku husi Munisípiu Lautem Natura FC obrigadu tenke sofre golu haat kontra adversáriu AS Cantada, iha jogu kontinuasaun kopa Federasaun Futeból Timor-Leste (FFTL) ne’ebé realiza iha Estádiu Munisipál Dili, sabadu loraik ne’e.
Husi derrota ne’e lori Natura tenke okupa iha pozisaun ikus liu grupu A ne’ebé kompostu husi klube Relay FC, DIT FC no AS Cantada iha pozisaun aman tanba save ona pontu tolu, nune’e Relay ho DIT foin save pontu ida-ida.
Tanna ne’e iha jogu tuir mai DIT, Relay ho Nature tenke halo jogu ne’ebé brillante nune’e bele save pontu tolu nune’e bele ultrapasa ba oitavu finál. Alende ne’e Cantada mós tenke esforsu iha nia jogu rua ikus nune’e bele aumenta tan pontu.
Hanesan kulturafuteból nian iha kampo laran durante jogu la’o ekipa rua liu husi jogadór sira tenke halo kontra no atake ba malu tuir tékniku no abilidade ekipa idaidak nian nune’e bele fó vitoria ba sira nia ekipa.
Durante jogu la’o Cantada lansa kedan kontra no atake ne’ebé másimu hasoru Nature, iha kontra no atake ne’e halo Nature tenke falla maka’as nune’e jogu la’o seidauk to’o minutu ida foin to’o segundu 42 jogadór Januario Pinto (5) aproveita bola barullu iha lina oin Nature nian bainhira bola kantu jogadór ne’e utiliza nia ulun hodi baku bola tama liu ba rede laran Nature nian. Ho golu ne’e muda kedan rezultadu ba 1-0, golu ne’e hanesan mós golu ne’ebé lais liu durante kopa la’o.
Maske golu ona, Nature la preokupa kontinua luta, halo jogu barak liu iha ofensivu, maibé Cantada tenta hamate tutuir Nature nia jogu, Nature mós falla barak iha lina klaran nune’e difikulta avansadu sira hetan bola ho di’ak. Tanba ne’e lina klaran ekipa rua nian komanda direita husi Cantada nune’e Cantada halo jogu livre.
Oportunidade barak mak Cantada hetan maibé la ezekuta ho di’ak ikus la rezulta golu. Sutu barak mak avansadu Cantada lansa maibé guarda rede Nature tenta baku sai no sutu barak mós la kona iha alvu.
Nature nafatin esforsu maske lakon bola boarak, jogadór sira nafatin iha vontade jogu maibé to’o iha área finalidade sempre falla iha ezekusaun, sutu barak mak defeza Cantada halo mate no barak mós guarda rede Cantada salva.
Jogu la’o to’o minutu 41 treinadór Cantada haree nia jogadór Julio 23 halo fallansu barak nia deside dada sai hodi hatama fali jogadór Bonarudin (19) nune’e bele suporta fali lina klaran ne’ebé antes ne’e Julio halo falla.
Ekipa rua kontinua sadik malu iha kampo laran hodi koko forsa ba malu, liu husi fintas bola ba mai, pasa bola ba mai husi ain ba ain maibé minutu 45 kompleta ona árbitru deside aumenta adisionál minutu ida maibé to’o remata laiha tan golu ruma akontese no jogu primeira parte termina vitoria hela próvijoriu ba Cantada 1-0.
Hakat ba segunda parte ekipa rua nafatin hamoris hikas kontra no atake, Nature halo jogu ho velosiade lais atu buka hatama lalais golu maibé la konsege tanba adversariu la fó fatin ba jogadór Nature halo golu tuir nia hakarak, nune’e esforsu sira hela de’it hanesan esforsu.
Nune’e iha minutu 46 jogadór Cantada halo presaun makas fó ameasa barak ba guarda rede tanba falla iha lina defeza treinadór Nature deside dada sai jogadór na’in rua Gil (15) hodi hatama fali Gabriel (26), Manuel (12) substitui fali husi Nelson (8) maibé seidauk halo mudansa ba Nature nia jogu.
Fallansau barak mak Nature halo ikus fó oportunidade ba Cantada hodi ameasa guarda rede tuir hakarak, maibé amesa sira hela de’it hanesan ameasa nune’e iha minutu 54 treinadór Cantada deside dada sai tan jogadór Nelson (25) hodi hatama fali Albertino (20) husi mudansa ne’e halo jogu Cantada nian la’o ho másimu liutan nune’e iha minutu 56 bola barullu iha lina oin Nature nian bola kona liu ba jogadór Nature nia liman iha kedan grande área laran ikus árbitru deside fó penaliade.
Penalidade ka sutu livre ne’e ezekuta husi jogadór kapitaun Pascoal (9), durante sutu halo guarda rede Nature tuda aan la to’o ikus bola tama liu ba rede laran husi parte ain los nian. Nune’e rezultadu muda aan ba 2-0.
Golu ne’e halo Nature sente apertadu tebes, esforsu hotu halo maibé la hatudu rezultadu di’ak, nune’e iha minutu 81 sorte aat nafatin tun hikas ba Nature hodi simu tan golu ida hodi muda rezultadu ba 0-3, golu ne’e ezekuta husi jogadór suplenti Bonarudin (19) bainhira bola barullu iha lina oin Nature nian.
Haree ba golu ne’ebé nahe-aan dook ba-bebeik, Nature komesa falla iha kontrolu ladun ona seriu atu hatudu jogu, halo jogu maibé oinsa tahan de’it to’o minutu termina, Cantada la intrese nafatin lansa atake ne’ebé maka’as oinsa aumenta golu, maibé jogu la’o to’o minutu 90 laiha tan golu ruma mak akontese, nune’e árbitru deside aumenta tan adisionál minutu 2, iha minutu adisionál ne’e fó fali oportunidade ba Cantada hodi kompleta nia golu liuhusi jogadór Pascoal (9) iha minutu 90+2 nune’e hametin rezultadu ba 4-0. Golu ne’e hanesan golu ikus hodi termina jogu entre ekipa rua.
Jogu ne’e dirije husi árbitru prinsipál Fernando Costa, juiz liña Henrique Pereira, Paulo da Costa no árbitru rezerva Pedro Braga. Durante jogu la’o iha ambitu hakmatek no jogadór sira kumpri regulamentu jogu nune’e laiha jogadór ida mak hetan kartaun mean no kinur.
Notísia relevante: DIT FC ho Relay FC fahe pontu ba malu iha abertura kopa FFTL
Jornalista: Hortencio Sanchez
Editór: Florencio Miranda Ximenes
