BAUCAU, 20 maiu 2024 (TATOLI) – Autoridade Administrasaun Munisipál Baucau fó-sai mensajen iha loron Restaurasaun Independénsia tinan ne’e atu Baucau kontinua iha pas no konsidera malu hodi hasoru implementasaun podér lokál no desentralizasaun administrativa tuir polítika IX Governu Konstitusionál nian.
Sekretáriu Munisipál Asuntu Planeiamentu Dezenvolvimentu Integradu Munisipál, Eduardo Ximenes, esplika, selebrasaun loron nasionál restaurasaun independénsia ba tinan-ne’e hahú ho misa agradesementu iha loron-sabádu, 18 maiu, kari ai-funan iha jardín eroi fo omenajen ba lutadór nasionál no remata ho hasa’e bandeira iha resintu Administrasaun Munisipál Baucau.
“Baucau oan tenke nafatin konsidera malu nune’e munisípiu ida-ne’e iha kondisaun hodi atinje desentralizasaun administrativa tuir polítika IX Governu nian,” Sekretáriu Munisipál Asuntu Planeiamentu Dezenvolvimentu Integradu Munisipál Baucau hateten bainhira sai Inspetór serimónia iha Vila Nova, segunda ne’e.
Maske tinan-22 ona Timor-Leste restaura Independénsia maibe kona-ba dezenvolvimentu sei kontinua la’o ba oin nune’e inportante liu mak Baucau oan tenke kontinua konsidera malu, koordena no komunika ba malu atu lori dezenvolvimentu iha Baucau liuliu hamutuk lori desentralizasaun administrativa iha futuru.
Tuir polítika IX governu konstitusionál, fo prioridade ba kada munisipiu inklui Baucau atu prepara aan hodi prienxe rekizitu mínimu hodi implementa lei podér lokál no desentralizasaun administrativa inklui lei eleisaun munisipál ne’ebé tuir tarjetu sei realiza iha tinan-2026.
Tinan-ne’e komunidade entusiazmu partisipa iha selebrasaun loron nasionál tanba konsidera iha sentimentu patriotismu no iha nasionalismu nu’udar presta onra no gloria ba eroi hotu ne’ebé sakrifika aan hodi liberta rai Timor-Leste.
“Ita-nia komunidade senti loron ohin-ne’e inportante atu fo minutu balun hodi hato’o onra no gloria ba eroi sira-ne’ebé safkrifika aan ba luta libertasaun nasionál,” Eduardo Ximenes akresenta.
Alende hasa’e bandeira, selebrasaun loron Restaurasaun Independénsia iha Baucau aprezenta mos drum band husi eskola Sekundária Tékniku Vokasionál Vila Nova, Baucau nu’udar animasaun ba loron nasionál tinan-ne’e.
Munisípiu Baucau tinan-ne’e, hetan alokasaun orsamentu ba loron-Restaurasaun Independénsia hamutuk rihun-neen ne’ebé aloka Administrasaun Munisipál hamutuk ho postu Baucau Vila hamutuk rihun rua-resin, enkuantu postu lima seluk kada postu $600.
Jornalista : Natalino Belo
Editór : Evaristo Soares Martins
