EDUKASAUN

Garante kualidade edukasaun, presiza atualiza kurríkulu, polítika, infraestrutura no manorin-na’in

Garante kualidade edukasaun, presiza atualiza kurríkulu, polítika, infraestrutura no manorin-na’in

Prezidente IPB-KRXG, Acácio Cardoso Amaral. Imajen TATOLI/Egas Cristóvão

DILI, 20 maiu 2024 (TATOLI) – Prezidente Institutu Politékniku Betano (IPB), Acácio Cardoso Amaral, hateten, atu garante kualidade edukasaun iha Timor-Leste (TL) mak atualiza kurríkulu tuir demanda merkadu atuál no ba futuru, inklui reforma polítika edukasaun.

Nune’e mós, infraestrutura ho fasilidade modernu no integra ho teknolojia, énfaze pensamentu krítiku no kreatividade, aposta ba kualidade manorin-na’in sira liuhusi formasaun kontinua.

“Atu mellora rekursu umanu presiza tau-matan ba buat lubuk ida hanesan kualidade manorin-na’in, kurríkulu, infraestrutura, polítika edukasaun ne’ebé di’ak ba dezenvolvimentu profesionál sira mak presiza fornese oportunidade ba treinamentu atu ajuda manorin-na’in sira atualiza best practice iha área edukasaun,” Prezidente IPB dehan ba TATOLI, via WhatsApp, domingu ne’e.

Prezidente IPB ne’e dehan tan, presiza mós saláriu ne’ebé kompetitivu atrai manorin-na’in sira, ne’ebé kualidade.

Presiza implementa “sertifikasaun ba manorin-na’in sira” atu asegura sira ne’ebé merese sai manorin-na’in ho kualidade mak bele hanorin.

“Presiza iha dezenvolvimentu kurríkulu ne’ebé iha relevánsia. Kurríkulu tenke atualiza hela de’it tuir demanda merkadu agora no ba futuru, énfaze iha critical thinking (pensamentu krítiku) no kreatividade,” nia subliña.

Kona-ba infraestrutura, Akadémiku ne’e hateten, fornese fasilidade modernu no integra ho teknolojia. Katak, asegura eskola sira asesu ba teknolojia no asesu ba internet.

“Polítika no governasaun, presiza reforma polítika edukasaun. Ita-nia lei baze da edukasaun Lei Nu. 14/2008, kle’ur ona no presiza halo revizaun fila fali nune’e bele kondisiona ho edukasaun reál. Tempu agora implementa polítika ne’ebé suporta ekidade iha edukasaun hanesan redus númeru estudante iha sala-laran (standard 25-30 alunu/aula), nune’e promove edukasaun inkluzivu,” nia dehan.

Prezidente IPB hatutan katak dezenvolve sistema atu hadi’a eskola no manorin-na’in sira-nia performansia mak halo investimentu maka’as iha eskola tékniku vokasionál. Agora daudauk eskola vokasionál iha maibé menus fasilidade tanba falta investimentu.

“Ita-nia infraestrutura presiza halo investimentu atu fornese kondisaun ne’ebé favorável ba prosesu aprendizajen. Infraestrutura presiza halo tuir standard (padraun) atu estudante no manorin-na’in sira sente konfortável bainhira hanorin. Hau-nia haree eskola balun iha área remota ho kondisaun lamentável tebes. Presiza hadi’a kondisaun sira-ne’e,” nia tenik.

Aleinde ne’e, Prezidente IPB, Acacio Cardoso dehan, presiza iha biblioteka nasionál ida ne’ebé modernu, permite asesu ba jornál sientifiku oioin.

“Hau-nia haree livru manuál hanorin nian sei menus liu. Presiza iha fundu ruma atu enkoraja manorin-na’in sira prodús manuál hanorin nian tuir kurríkulu no standard pedagojia nian. Kurríkulu presiza atualiza beibeik tuir demanda merkadu no merkadu traballu nian ba agora no ba futuru,” Prezidente IPB akresenta.

Tanba ne’e mak, tuir akadémiku ne’e, presiza innvestimentu iha infraestrutura, kapasitasaun rekursu umanu ka kapasita manorin-na’in sira regularmente ka kapasitasaun kontinua.

Ho nune’e Estadu presiza tau-matan maka’as ba setór edukasaun husi ensinu báziku to’o ensinu superiór. Agora ne’e entre ensinu báziku, ensinu sekundáriu no ensinu superiór duun malu hela. Ensinu sekundáriu duun ba ensinu báziku la iha kualidade, ensinu superiór duun ba ensinu sekundáriu la iha kulidade no ensinu báziku duun ba ensinu superiór mak la oferese manorin-na’in kualidade atu hanroin ho kualidade.

“Governu presiza halo peskiza atu deskobre fukun ne’e iha ne’ebé atu buka ninia solusaun. Daudaun ne’e teknolojia avansadu loos ne’ebé bele fó vantajen ba estudante no manorin-na’in sira no estudante sira, karik sira hakarak aproveita ba aspeitu pozitivu sira. Infelizmenete ho teknolojia ne’ebé avansadu, bele mós influénsia estudante sira-nia performansia tanba sira preokupa ho aparellu sira ne’e, haluha estuda,” nia konsidera.

Nia hatutan, “Hau-nia observasaun, estudante sira-nia vontade atu estuda menus liu, sira barak mak preokupa liu ho mídia sosiál. Manorin-na’in barak mak tama ona ba idade reforma. Presiza implementa ona reforma obrigatóriu nune’e fó biban ba manorin-na’in joven sira atu hanorin. Presiza rekrutamentu ba manorin-na’in joven sira ne’ebé kualidade liuhosi rekrutamentu ne’ebé rigór”.

Iha parte seluk, Dosente Komunikasaun Sosiál, iha Universidade Nasionál Timor Lorosa’e (UNTL), Roberto Pacheco, hateten, presiza mellora setór edukasaun iha Timor-Leste.

“Buat ne’ebé presiza atu mellora di’ak liu iha setór edukasaun mak formasaun ba profesór sira iha matéria ka kadeira oioin tantu iha língua no seluktan,” Pacheco hateten.

Relasiona ho infranstrutura eskolár, Akadémiku ne’e destaka igualdade tratamentu entre kapitál no área rurál. Katak, labele haree de’it infraestrutura sira iha Dili maibé mós zona rurál sira iha munisípiu.

“Ein-termu infraestrutura presiza tau-matan la’ós iha Dili laran de’it maibé mós iha munisípiu to’o postu administrativu tanba eskola barak mak aat no balun mós abandonadu tanba de’it profesór sira laiha no seluk tan,” Pacheco rekomenda.

Dosente UNTL ne’e salienta, bainhira kualidade edukasaun garante ona, infraestrutura eskolár sufisiente ona mak presiza livru manuál ne’ebé bele aumenta no hasa’e kapasidade intelektuál kada estudante nian.

“Livru manuál sira tenke halo barak liután, tanba tuir ha’u-nia observasaun, sim, iha livru manuál ba kada eskola maibé la natoon ba alunu sira. Tanba ne’e, dala barak estudante balun la iha oportuninade di’ak ba estuda. No, kurríkulu mós ha’u hanoin kada tinan lima presiza halo revizaun nune’e ita nia sistema edukasaun la atraza iha kotuk bainhira ita kompara ho nasaun vizinu,” nia sujere.

Kona-ba investimentu ba edukasaun nia kualidade, Pacheco, énfaze melloria Sistema edukativu no rekursu umanu.

“Investimentu ida-ne’ebé mak presiza atu mellora ita-nia sistema edukasaun mak mellora ita-nia rekursu umanu hodi fó bolsa ba estudante mellór klasifikadu sira, nune’e iha futuru ita sei la iha tan krize ba profesór sira hanesan daudauk ita hasoru hela. No, hau-nia haree ba parte pozitivu husi ita-nia setór edukasaun mak ha’u hanoin la iha propinas ba estudante sira to’o akaba sira-nia estudu”, nia dehan.

Jornalista: Osória Marques

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!