MUNISÍPIU, VIQUEQUE

PAM Viqueque: joven sira tenke sai promotór ba dezenvolvimentu munisipál

PAM Viqueque: joven sira tenke sai promotór ba dezenvolvimentu munisipál

VIQUEQUE, 20 maiu 2024 (TATOLI)-Prezidente Autoridade Munisípiu (PAM) Viqueque, Francisco C.S de Gonzaga Soares, husu joven sira valóriza ukun  rasik an hodi kontibui ba prosesu dezenvolvimentu iha munisípiu Viqueque.

“Ita esperansa katak ba oin munisípiu Vqueque sei iha mundansa barak ho animasaun oi-oin ne’ebé joven sira hatudu. Nune’e ba joven sira nafatin valoriza ba ukun rasik an ne’ebé ita amán sira luta to’o ukun rasik an, ita mak sai promotor ida iha prosesu dezenvolvimentu iha ita-nia munisípiu ida-ne’e”, Francisco C.S de Gonzaga Soares, hateten hafoin isár bandeira ramata, iha kampu futeból, Viqueque Vila, ohin.

Tanba Restaurasaun Independénsia ne’e sai hanesan obra ida ne’ebé  sosa  ho raan no ruin.

Nune’e, joven sira tenke hamutuk ho autoridade munisipál hodi lori dezenvolvimentu iha área bee-moos no eletrisidade inklui estrada.

“Maske la’o neineik, maibé ita nafatin esforsu hodi lori dezenvolvimentu ba oin ida-ne’e maka ita-nia esperasa”, katak nia.

Husu agradese ba komunidade sira tanba partisipa másimu iha serimónia isar bandeira ne’ebé komemora ba loron Restaurasaun Independénsia ba dala-22 ho tema Haforsa Instituisaun Estadu hodi Serbí Povu.

Iha fatin hanesan, eis PAM Viqueque, Januário Soares “Boly”, haktuir, komemorasaun ba dala 22 husi ne’e ba oin Viqueque mós tenke la’o ba oin servisu sira-ne’ebé uluk seidauk hotu kontinua hodi finaliza.

“Ba servisu sira-ne’ebé iha ha’u-nia mandatu seidauk ramata karik tenke kontinua nomós planu foun sira-ne’ebé PAM foun planu ona karik hatutan tán hodi  dezenvolve munisípiu Viqueque tanba ida-ne’e maka ita-nia povu hein”, nia sujere.

Iha serimónia komemorasaun ba dala-22 ne’e ekipa isár bandeira husi Eskola Sekundária Calixa, dram band husi sekundária Santo Estavão Viqueque. Enkuantu iha komemorasaun ne’e hatudu teatru no dansa kulturál ne’ebé aprezenta husi grupu Siralari no Joven Forsa umanismu.

Hetan partisipa husi Veteranu, komandante Polísia Nasionál Timor Leste (PNTL) munisípiu Viqueque, diretór munisipál, diretór liña ministeriál, autoridade lokál, komunidade no estudante iha postu Viqueque Vila.

Jornalista :Vitorino Lopes da Costa

Editór :Florencio Miranda Ximenes

iklan
iklan

Leave a Reply

iklan
error: Content is protected !!