Empreza Brunei Darrusalam atribui bolsa estudu ba timor-oan na’in-rua
DILI, 21 maiu 2024 (TATOLI)—Empreza Dayko husi Brunei Darussalam atribui ona bolsa estudu ba timor-oan na’in-rua, ne’ebé iha semana oin sei desloka atu halo estudu iha Brunei Darussalam.
“Em nome de Governu, agradese ba Brunei Darrusalam tanba atribui ona bolsa estudu ba estudante na’in-rua no ami ko’alia ona ho Embaixadór iha Timor-Leste, iha futuru bele estabelese serbisu iha área edukasaun iha ensinu superiór nian atubele ajuda garante dezenvolvimentu iha Timor-Leste,” Ministériu Ensinu Superiór Siénsia no Kultura, José Honório, hateten, iha serimónia asinatura akordu tékniku entre Ministériu Ensinu Superiór Siénsia no Kultura (MESSK) no Empreza International Dakyo Brunei Darussalam, iha salaun MESSK, Colmera, tersa ne’e.
Kooperasaun ida-ne’e importante hodi bele kontinua atribui bolsa estudu ba timoroan iha área oin-oin Tanba Timor-Leste sei hola parte mós iha ASEAN.
“Espera katak ba futuru empreza Dayko la’ós de’it fó bolsa ba ema na’in-rua maibé sei liu kuantidade ne’e,” nia akresenta.
Notísia relevante : Hametin kooperasaun bilaterál, Horta ho Xanana simu direta Liurai Brunei Darussalam
Delegasaun empreza internasionál Dayko, Awang Hadfi Lutfan, hateten, ajudu osan ba bolsa estudu ne’e hamutuk $15.000
Nune’e mós, Embaixadór Timor-Leste iha Brunei Darrusalam, Abel Guterres, informa, bolsa estudu ne’e maihusi empreza Dayko Brunei Darrusalam, ne’ebé investe ona durante tinan-22 ona, hahú tinan-2002 to’o agora.
“Sira mai investe ne’e iha situasaun ladi’ak maibé iha korajen. Ida-ne’e ita tenke apresia tanba sira fó bolsa estudu ba ita hodi halo estudu iha Brunei Darrusalam iha área ospitalidade,” nia dehan.
Bolseiru, Atanásio Afonso, sente orgullu tanba bele hetan oportunidade hodi kontinua estudu iha rai-li’ur.
“Hanesan sidadaun timoroan, sente orgullu tanba bele oportunidade di’ak ida-ne’e hodi bele hala’o estudu iha Brunei Darrusalam. Oportunidade ida-ne’e liu prosesu lubuk ida no ema barak mak kompete maibé agradese ha’u bele ultrapara prosesu selesaun sira-ne’e hotu. Ha’u-nia naran sai iha área ospitalidade,” nia agredese.
Atanásio Afonso ramata estudu iha tinan-2019, iha Eskola Sekundáriu Katólika Ave Maria, Suai, Covalima, ne’ebé iha tinan ne’e hetan oportunidade hodi kontinua estudu iha Brunei Darrusalam.
Bolseiru, Natalino de Jesus, sente kontente tanba bele hetan bolsa estudu hodi kontinua estudu no agradese tebes ba Governu no empreza Tayko.
“Ha’u kontente tanba bele halo estudu iha Brunei Darrusalam no estudu ne’e sei hala’o durante tinan-ida no fulan-lima. Ha’u-nia esperansa ida mak bainhira termina estudu ne’e sei aplika iha Timor-Leste, ba saida mak ami apreende iha ema-nia rain,” nia tenik.
Bolseiru ne’e ramata estudu iha tinan 2023, iha eskola São João Paulo II, iha munisípiu Aileu.
Jornalista : Osória Marques
Editora : Julia Chatarina
