SAÚDE

Janeiru-marsu: Servisu Saúde Dili rejista moras IRA 42.143

Janeiru-marsu: Servisu Saúde Dili rejista moras IRA 42.143

infesaun vias respiratóriu aguda (IRA). Ilustrasaun/Google

DILI, 21 maiu 2024 (TATOLI)–Servisu Saúde Munisipiu Dili, rejista moras Infesaun Vias Respiratóriu (IRA) hamutuk 42.143 iha kapitál Dili.

Diretór Servisu Saúde munisipiu Dili (SSD), Mateus Pinto, hateten husi totál ne’e servisu saúde Dili rejista husi Sentru Saúde Becora hamutuk 12.381, Comoro hamutuk 23.346, Formosa hamutuk 30.97, Metinaro hamutuk 420 no Vera Cruz hamutuk 2.899.

“Moras IRA iha munisipiu Dili, hahú husi janeiru, fevereiru no marsu, ita rejista kazu hamutuk 42.143 ne’ebé mak sira relata ba ha’u,” Diretór Mateus Pinto hateten ba jornalista sira iha sentru Saúde Formosa, tersa ne’e.

Nia esplika, kauza hosi IRA ne’e mai hosi rai-rahun no anin, tanba ne’e mak husu ba ema hotu atu kuidadu ema ida-idak nia saúde hodi halo prevensaun.

Nia husu ba komunidade bainhira la’o sai ba li´ur ne’e presiza uza máskara, mear taka ibun, deskansa barak no hemu bee barak, no bainhira sente moras tenke ba konsulta ka halo tratamentu saúde.

Aleinde ne’e, Sentru Saúde Dili mós rejista moras diareia akut iha sentru saúde Becora hamutuk 2.443, Comoro hamutuk 4.299, Formosa hamutuk 371, Metinaro hamutuk 366 no Vera Cruz hamutuk 609.

Nune’e mós, rejista moras diareia ho raan iha sentru saúde Becora hamutuk 73, Comoro hamutuk 104, Formosa hamutuk 21, Metinaro 0 no Vera Cruz hamutuk 10.

Moras Pneumonia ne’e, servisu saúde Dili rejista iha sentru saúde Becora hamutuk 720, Comoro hamutuk 1.567, Formosa hamutuk 134, Metinaro hamutuk 13 no Vera Cruz hamutuk 220.

Servisu Saúde Dili rejista moras Scabies iha sentru saúde Becora hamutuk 192, Comoro hamutuk 307, Formosa hamutuk 70, Metinaro 0 no Vera Cruz hamutuk 44.

Moras Kulit ne’ebé servisu saúde Dili tejista iha sentru saúde Becora hamutuk 3.489, Comoro hamutuk 7.242, Formosa hamutuk 316, Metinaro 0 no Vera Cruz hamutuk 1.239.

Moras Infesaun Vias Respiratória Aguda (IRA)

Moras infesaun Vias Respiratóriu Aguda (IRA) mak infesaun viral (infeksaun ne’ebé kauza hosi virus) ne’ebé akontese iha ita-nia dalan iis nian. Bainhira ita dada iis anin sei halai tuir ita-nia dalan iis nian antes to’o iha pulmaun. Normalmente ita-nia dalan iis hahú ka forma hosi Inus, Kavidade nasal (inus kuak), faringe no laringe (kanál rua ne’ebé nia lokalizasaun iha kakorok).

Anin sei pasa hosi dalan-isin hirak ne’e molok tama ba traqueia no pulmaun. Infesaun ne’ebé akontese iha ita-nia dalan-iis sei provoka ka halo ita sente susar no la konfortavél bainhira dada iis, no nu’udar konsekuénsia sei halo ita-nia isin falta anin hodi hala’o nia funsaun ho di’ak. Moras ida-ne’e fasil tebes da’et no fasil tebes atu kura.

Kauza hosi Infesaun Vias Respiratória Aguda

Moras IRA kauza hosi virus no bakteria ne’ebé invade diretamente ita-nia dalan iis liuhosi matan, inus no ibun. Virus sira-ne’ebé hamosu moras ne’e mak hanesan Rhinovirus, Coronavirus, Virus parainfluenza, no adenovirus.

Fatór sira-ne’ebé kontribui hetan moras IRA

Fatór sira-ne’ebé kontribui atu hetan moras IRA mak hanesan (1) Relasaun ho Individu; Laabarik sira-ne’ebé la simu imunizasaun, bebé ne’ebé la hetan susu hosi inan, bebé no labarik sira menór ho idade tinan ida, sistema imunolojia fraku (daya tahan tubuh lemah), má nutrisaun, moras krónika, ijiéne pesoál ne’ebé la di’ak.

Relasiona ho Ambiente mak; Mudansa temperatura ambientál, poluisaun (rai-rahun), asinamentu (kepadatan, overcrowding), falta ventilasaun iha uma, fumadór barak (su’ar hosi sigaru bele hasa’e insidénsia ba moras ne’e) no ahi-su’ar.

Transmisaun

Moras Infesaun Vias Respiratóriu Aguda (IRA) transmite ka da’et liuhosi kontaktu direta (koali’a, fani, kabeen) ho ema ne’ebé hetan tiha ona moras ne’e.

Sintóma

Moras Infesaun Vias Respiratóriu Aguda (IRA) sei hatudu sinál no sintóma hanesan; Inus been turu no suli ka inus metin, me’ar (me’ar maran), isin kolen ka baruk, isin manas (dalaruma), garganta moras, no ulun moras (dalaruma).

Tratamentu

Tratamentu ba iha moras infesaun vias respiratóriu aguda (IRA) iha oin rua (2) mak tratamentu medikamentoza (ho aimoruk) no tratamentu non-medikamentosa (la uza ai-moruk).

Tratamentu medikamentoza (ho aimoruk): médiku sira mak sei fó aimoruk bainhira ita ba hala’o konsulta iha sentru saúde ka iha ospitál. Tratamentu non-medikamentoza (tratamentu la ho ai-moruk): tratamentu ne’ebé prátiku no ita bela halo hanesan suas ho bee manas nia su’ar, hemu bee no jus barak, deskansa barak no selu-seluk tan.

Prevensaun

Moras infesaun vias respiratóriu fasil tebes atu kona ema maibé fasil tebes mós atu prevene, sé ita iha konsiénsa no kultura saudavel. Asaun ka hahalok sira-ne’ebé ita tenke halo hodi prevene moras ne’e mak hanesan; fase liman ho sabaun, hadook aan hosi ahi-su’ar no rai-rahun, taka inus no ibun bainhira fanin ka me’ar, susu-been ekskluzivu ba bebé foin moris to’o fulan neen (6), labele fuma besik, halo vasinasaun, no kuidadu ijiéne pesoál.

Jornalista : Jesuína Xavier                   

Editór        : Cancio Ximenes

iklan
iklan

Leave a Reply

iklan
error: Content is protected !!