iklan

EKONOMIA, HEADLINE

MAPPF no parseiru sei diskute no identifika atividade ne’ebé presiza hetan apoiu

MAPPF no parseiru sei diskute no identifika atividade ne’ebé presiza hetan apoiu

Foto ilustrasaun.

DILI, 21 Maiu 2024 (TATOLI) – Ministériu Agrikultura, Pekuária, Peska no Floresta (MAPPF) sei hasoru malu, iha semana oin, ho parseiru dezenvolvimentu sira hodi diskute no identifika apoiu ne’ebé parseiru sira presiza atu fó.

“Parseiru ministériu nian barak demais, tanba ne’e ita iha ona planu atu semana ida ne’e sei kria technical working group ida ho parseiru sira, nune’e ita bele halo identifikasaun ba atividade saida maka sira atu apoia mai ministériu”, Koordenadora Unidade Agrokomérsiu, Seguransa Alimentár no Kooperasaun, Ervina Soares Pinto, hateten iha Comoro, ohin,

Koordenadora ne’e esplika katak enkontru ida ne’e importante tebes ba ministériu, nune’e saida de’it maka parseiru sira fó tulun ba MAPPF labele xoke malu, liuliu iha setór agrikultura, kafé, peska no floresta ne’e tenke halo armonizasaun ida, nune’e labele implementa iha fatin ida de’it.

“Ita loke nafatin apoiu husi ita-nia parseiru sira, maibé ita sei akompaña sira bainhira sira hakarak tulun iha atividade produsaun hare, ita bele orienta sira katak fatin ida ne’e sira bele tama, ida ne’ebá sira labele tanba iha ona parseiru balun maka tama ona hodi fó apoiu”, nia salienta.

Programa ida ne’e sei realiza kada fulan tolu, nune’e bele simu informasaun detalla husi parseiru sira. Sorumutu ne’e sei koloka programa sira, nune’e bele iha armonizasaun, tanba durante ne’e, apoiu husi parseiru sira seidauk uniformiza.

“Maibé ho planu no programa sira ne’ebé diresaun hahú kria ona atu implementa iha semana ida ne’e nu’udar meius ida atu bele halo monitorizasaun ba serbisu no apoiu sira ne’ebé parseiru sira halo, nune’e labele mosu dezentendimentu iha baze entre sira”, salienta.

Dadus husi ministériu hatudu katak parseiru sira ne’ebé apoia atividade MAPPF nian iha setór agrikultura, pekuáriu, peska no floresta mai husi Xina, Japaun-JICA, inklui Programa Nasaun Unida ba Dezenvolvimentu, Organizasaun Nasaun Unida ba Aliementasaun no Agrikultura, Programa Alimentár Mundiál, Ajénsia Estadu Unidu ba Dezenvolvimentu Internasionál, CARE Internasionál no seluk tan

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!