Ministru José Honório husu UNTL loke fakuldade foun iha Hera
DILI, 21 maiu 2024 (TATOLI)–Ministru Ensinu Superiór Siénsia no Kultura, José Honório da Costa Pereira Gerónimo, husu ba Universidade Nasionál Timor-Lorosa’e (UNTL) bainhira atu loke fakuldade foun bá de’it iha Hera nune’e bele iha espasu ba estudante sira.
“Daudaun ne’e dehan hela ba UNTL tanba nu’udar universidade públiku, sira hanoin loke sira-nia kursu ne’e ba Hera de’it tanba Dili kloot liu, iha Hera ne’e rai luan hela, IX Governu nia polítika mak sira tenke loke kursu iha Hera, fakuldade ne’ebé iha mamuk atu loke tan tenke loke iha Hera. Governu husu nafatin katak ita tenke aposta ba kualidade, ita la’ós ko’alia kualidade ohin kedas hotu, maibé gradualmente ita rezolve situasaun balun. Ministériu Ensinu Superiór Siénsia no Kultura (MESSK) disponível ba ida-ne’e atu haree,” Ministru informa iha salaun MESSK, Colmera, tersa ne’e.
Notísia relevante : Reitór UNTL rekomenda MESSK mellora infraestrutura UNTL
Aleinde ne’e, Governu antes ne’e foti ona desizaun atu muda sidade universitáriu husi Aileu ba Hera.
Antes ne’e, Reitór UNTL, João Soares Martins, husu ba IX Governu atu sériu dezenvolve sidade universitáriu ne’ebé antes ne’e deside muda ona.
Sidade universitáriu Aileu inisia husi XIII Governu, ne’ebé konsege halo ona lansamentu no halo ona kompensasaun inklui selu rai afetadu sira iha munisípiu Aileu, maibé agora paradu hela tanba IX Governu la prevee orsamentu ba kontinuasaun programa ne’e.
“IX Governu deside kansela sidade universitáriu Aileu, agora atu muda fali ba Hera. Tanba ne’e, ami husu ba Governu no Parlamentu Nasionál atubele tau kompromisu boot, nune’e bele dezenvolve sidade universitariu ne’ebé mak dedikadu ona iha Hera,” nia akresenta.
UNTL iha ona planu atu propoin orsamentu tinan oin ba Governu atubele hodi hahú halo espansaun ba infraestrutura universitáriu.
“Ami hahú ona fakuldade agrikultura mak halo inaugurasaun ona. Fakuldade ne’e funsiona ona hamutuk ho fakuldade enjeñaria no sei aumenta ba fakuldade Medisina. Finalmente sei kobre ba fakuldade 10 iha UNTL nia laran, nune’e ba oin karik harii fakuldade 20 atubele ba hotu Hera,” nia informa.
Jornalista : Osória Marques
Editora : Julia Chatarina
