OÉ-CUSSE, 22 maiu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Lobato, kuarta ne’e identifika kontainér sira iha aldeia Mahata, suku Costa, sub-rejiaun Pante Makasar ba futuru atu estabelese tán postu saúde ida.
“Sekretáriu Rejionál saúde nia hato’o nia ideia ida, atu loke sentru saúde ida ba parte osidentál nian, ha’u sente ideia di’ak, atu ema sira husi parte Mahata lalika ba to’o iha sidade atu simu asisténsia saúde nian, ne’ebé agora ha’u ho Sekretáriu Rejionál sira ami sei tuur hamutuk atu deskuti, opsaun ne’ebé di’akliu ida-ne’e mak ami foti, maibé primeiru mak ne’e tenke halo reabilitasaun tanba fatin sira-ne’e abandonadu, Estadu gasta osan barak ona ba fatin sira-ne’e, mas fatin sira-ne’e abandonadu no komesa aat ona, entaun presiza hadi’a nune’e bele sai fali ba fasilidade saúde,” Rogério Lobato, ba jornalista sira iha aldeia Mahata, Oé-Cusse.
Sekretáriu Rejionál ba Asuntu Saúde, Luíz de Jesus Neno, hateten, iha sub-rejiaun Pante Makasar liu-liu zona sentrál suku Costa, presiza aumenta fasilidade saúde, nune’e bele hakbesik fasilidade ba populasaun atu asesu ho distánsia besik.
“Komunidade sira husi bairru Mahata, Krúz no Oésono durante ne’e asesu ba sentru saúde Kiomaonteko dook, tanba ne’e ita tenke fahe rua iha parte leste tenke iha sentru saúde ida iha oeste tau tán ida, ne’e mak ohin enkontru reuniaun membru autoridade, deside katak au entrega ba saúde ba oin atu harii sentru saúde foun ida iha Mahata,” nia katak.
Entretantu, iha Oé-Cusse totál sentru saúde hamutuk no postu saúde 20 iha territóriu Oé-Cusse.
Notísia relevante: Autoridade reativa atendimentu saúde iha Hospital Referál Oé-Cusse
Jornalista: Abílio Elo Nini
Editór: Evaristo Soares Martins
