HEADLINE, VIQUEQUE

Autoridade Viqueque Vila alerta ba abitante sulan animál

Autoridade Viqueque Vila alerta ba abitante sulan animál

Administradór Postu Administrativu Viqueque Vila, munisípiu Viqueque, Leopoldo da Costa Alves. Imajén Tatoli/Vitorino Lopes da Costa

VIQUEQUE, 22 maiu 2024 (TATOLI)- Administradór  Postu Administrativu Viqueque Vila, munisípiu Viqueque, Leopoldo da Costa Alves, alerta ba abitante iha postu Viqueque Vila atu sulan hotu, nune’e labele la’o iha dalan públiku sira.

“Ha’u sei la fó tolera ba abitante sira-ne’ebé gosta husik nia-animál livre iha Vila laran tanba ita tolera beibeik ona. Ha’u sei la’o tuir ba kada uma-kain idaidak hodi  rejista atubele hatene”,  Leopoldo da Costa Alves, hateten ba jornalista sira, iha postu Viqueque Vila, ohin.

Tanba animál husik ka abandona lori impaktu ba saúde públika, nune’e sei halo koordenasaun ho xefe suku sira iha postu Viqueque Vila atu kasa ka oho animál ne’ebé abitante sira husik livre.

“Ita hakarak kapitál ne’e tenke moos, atu ema vizita karik ita-nia ambiente moos. Daudaun ita haree animál sira hanesan bibi, fahi no karau husik livre.  Ida-ne’e hatudu imajen ladi’ak, se mak haki’ak animál tenke kria fatin ba animál sira atu sulan la’ós abandona”, nia haktuir.

Nune’e, Autoridade ne’e husu, abitante sira atu koopera hodi sulan animál atu garante kapitál Viqueque sai furak no moos.

Jornalista  : Vitorino Lopes da Costa

 Editór       : Florêncio Miranda Ximenes

iklan
iklan

Leave a Reply

iklan
error: Content is protected !!