DILI, 22 maiu 2024 (TATOLI) – Ekipa konjuta hosi Komisaun Anti-Korupsaun, Komisaun Funsaun Públika, Inspetór Jerál Estadu, Patrimóniu Estadu, vizita supreza ba Ministériu Komérsiu no Indústria hodi haree ba funsionamentu ministeriál.
“Ami Ekipa konjunta hosi Komisaun Anti-Korupsaun, Inspetór Jerál Estadu, Patrimóniu Estadu no Komisaun Funsaun Públika, ami mai hanesan prevensaun ida liuliu ba funsionáriu sira ba ne’ebé, tama servisu tarde, ami rekolla ida-ne’e no mós liga ba boa governasaun ne’ebé mak iha”Komisariu KFP Agapito da Conceição, hateten ba jornalista sira iha MCI Bebora, ohin.
Nia dehan, ekipa konjunta ida-ne’e, idaidak haree ba sira-nia servisu hanesan CAC, IGE no Patrimóniu Estadu haree liu ba veíkulu no aprovizionamentu liuliu utilizasaun veíkulu ba loron feriadu sira.
“Hosi vizita supreza CAC ho IGE foka liu ba veíkulu sira no mós aprovizionamentu, agora Patrimóniu Estadu haree liu ba veíkulu sira ne’ebé mak utiliza iha MCI, liuliu utiliza veíkulu sira iha loron ferias, hanesan sábadu no domingu, entaun ida-ne’e mak ami-nia objetivu atu halo prevensaun ida hodi hatudu ba Governu atuál atu hala’o servisu tenke ho di’ak”, nia afirma.
Nia esplika, vizita ida-ne’e laos mai iha MCI de’it maibé sei ba mós ministériu sira seluk. Nune’e ekipa konjunta sira sei halo relatóriu mai MCI atu rekolla lista prezensa sira no mós servisu ne’ebé liga ba boa governasaun nian.
“Ami-nia vizita ida-ne’e sei ba hotu ministériu sira seluk maibé ami labele dehan ba ita boot sira, ami sei ba nonok de’it”, nia relata.
Iha fatin hanesan, Diretór Jerál Prevensaun CAC, Rosario Salsinha Araujo, dehan ko’alia kona-ba boa governasaun tenke kontrola funsionamentu ministériu sira, atu nune’e servisu bele la’o ho di’ak.
“Ita-nia primeiru-ministru ko’alia bebeik katak kuidadu osan povu nian, entaun ida-ne’e mak ami atu haree iha parte tolu, mak hosi rekursu estadu nian hodi promove mak osan materiál no ema, entaun buat tolu ne’e tau hela iha instituisaun idaidak nian fatin atu jere, bainhira jere di’ak mak boa governsaun mós la’o ho di’ak”, Rosario Salsinha Araujo, haktuir.
Vise Ministru Indústria, Augusto Junior Trindade, agradese ba vizita supreza hosi ekipa konjuta sira mai atu haree ba servisu MCI nian.
“Vizita ida-ne’e importante tebes ba governasaun ida-ne’e, tanba ko’alia kona-ba boa governasaun tenke iha chek and balance, tanba governasaun ida halo servisu ruma, iha instituisaun indepedente sira hala’o sira-nia kna’ar mai halo fiskalizasaun nune’e servisu sira ne’e ba oin sai di’ak liután”, Agostu Junior Trindade konklui.
Jornalista ; Felicidade Ximenes
Editór : Zezito Silva
