DILI, 22 maiu 2024 (TATOLI) – Governu liuhusi reuniaun Konsellu Ministru, kuarta ne’e, iha Palásiu Governu Dili, aprova projetu Rezolusaun Governu ba atribuisaun donativu ida ho valór $60.000 ba Reprezentasaun Permanente Repúblika Árabe Saaraui Demokrátika iha Timor-Leste.
Rezolusaun ne’e aprezenta husi Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, ne’ebé reprezenta husi Primeiru-Ministru.
“Medida ida-ne’e hametin lasu istóriku ne’ebé liga Timor-Leste no Repúblika Árabe Saaraui Demokrátika, bazeia ba dezeju komún hodi luta ba autodeterminasaun, povu Saharaui,” katak iha nota ne’ebé Agência TATOLI asesu husi media Gabinete Primeiru-Ministru, kuarta ne’e.
Prinsípiu solidariedade ba luta povu nian ba libertasaun nasionál no direitu ba autodeterminasaun no independénsia, ne’ebé hatuur iha Konstituisaun Repúblika, iha Rezolusaun Parlamentu Nasionál kona-ba solidariedade no apoiu ba povu Saaraui.
Nota ne’e sita mós katak iha faktu katak Timor-Leste kontribui husikedas tinan 2011, ba funsionamentu Reprezentasaun Permanente iha Dili, liuhusi konsesaun subsídiu anuál hodi hala’o sira-nia atividade iha Timor-Leste no iha rejiaun ne’e.
Jornalista: Hortencio Sanchez
Editór: Florencio Miranda Ximenes
