Governu husu Komandu PNTL no F-FDTL kria ekipa traballu ba seguransa vizita Papa
DILI, 22 maiu 2024 (TATOLI) – Komandante Jerál PNTL, Komisáriu Jerál Polísia, Henrique da Costa, dehan Governu liuhosi rezolusaun husu komandu PNTL no F-FDTL atu kria ekipa traballu ba seguransa vizita Papa.
“Ami simu rezolusaun ida hosi Governu tanba ne’e mak ohin ha’u mai enkontru ho komandante mós aprezenta rezolusaun Governu nian ne’e mai ha’u, mezmu ke iha loron hirak ba kotuk ita hetan ona orientasaun hosi sua eselénsia ministru interiór atu ita halo komunikasaun no kordenasaun, maibé ho rezolusaun ida-ne’e ita servisu hamutuk atu nunee bele prepara ekipa traballu ida hodi responde vizita Papa. Rezolusaun ida atu kria tarrefa ba parte prevensaun ninian no mós represaun nian”, Henrique da Costa hafoin hasoru malu ho Xefe Estadu Maiór Jenerál F-FDTL Tenente Jenerál Domingos Raul Falur Rate Laek iha Kuartel Jenerál F-FDTL, kuarta ne’e.
Nia dehan, ekipa traballu ba seguransa vizita Papa ne’e lideradu hosi Segundu Komandante Jerál Komisáriu Polísia Pedro Belo no Koronél Esteves.
“Aban ekipa ne’e sei ba Operasaun Nasionál atu koalia kona-ba planu operasaun vizita Amo Papa nian ne’ebé sei lidera hosi komandante operasaun”, nia adianta.
Komisáriu Henrique, adianta Komandu F-FDTL no PNTL, iha tempu badak nia laran, sei instala sentru ida ho naran komandu kontrola koordena, ne’ebé sei estabelese iha Komandu Jerál PNTL no sentru ida-ne’e nia funsaun atu membru hosi komandu rua bele halo koordena no kontrola ba situasaun seguransa sira durante vizita Papa nian iha Timor-Leste.
“Tanba ita-nia parseiru sira hosi forsa defeza sei apoiu PNTL, entaun ita sei instala ita-nian sentru komandu iha ne’ebá”, nia informa.
Kona-ba efetivu hira mak Komandu PNTL sei sei hatún, Komisáriu Jerál PNTL ne’e hatan katak efitivu hira ne’e depois PNTL prepra tiha mak foin fó sai, maibé PNTL preparadu atu halo duni seguransa ba vizita Papa nian.
Iha fatin hanesan, Xefe Estadu Maiór Jenerál F-FDTL, Tenente Jenerál Falur Domingos Raul Rate Laek, hateten simu ona rezolusaun hosi Governu hodi husu Komandu F-FDTL no PNTL nia preparativu no empeñamentu operasaun konjunta F-FDTL no PNTL ba vizita Papa.
“Tanba ne’e mak ha’u bolu Komisáriu Jerál Henrique no Segundu Komandante Jerál PNTL ho urjente mai para ami informa ba malu hodi haree atu ajusta planu preparasaun ba resesaun Amo Papa ninian”, nia afirma.
Nia dehan, seguransa ba iha vizita Papa ne’e sei envolve seguransa no Defeza inklui saran no komponente hotu hotu para hotu hotu apoia seguransa.
“Ida-ne’e ha’u nia kompromisu ida bainhira iha ha’u-nia diskursu primeira bainhira ha’u simu pose hanesan Xefe Estadu Maiór Jenerál F-FDTL forsa armada tenke apoia forsa seguransa, ha’u implementa nafatin ida-ne’e, tenke sai parseiru ba dezenvolvimentu nasaun nian, parseiru ba setór seguransa no parseiru ba buat hotu ne’ebé lao iha Timor-Leste tanba forsa armada ne’e lao vokasionadu. Ha’u kontinua ha’u nia kompromisu ida-ne’e”, nia afirma
Nia dehann, F-FDTL preparadu atu fó seguransa ba vizita Papa mai Timor-Leste.
Jornalista: Natalino Costa
Editór : Zezito Silva
