DILI, 22 maiu 2024 (TATOLI) – Jogadór avansadu União Fortaleza Lázaro Ximenes (7) susesu lori sai nia ekipa husi derrota bainhira kontra adversáriu Dark Blue FC ho rezultadu 1-1, iha jogu kontinuasaun Maun Boot Kay Rala Xanana Gusmão ne’ebé realiza iha Estádiu Munisipál Dili, kuarta lokoraik ne’e.
Bainhira jogu hahú ekipa rua lansa kedan kontra no atake ba malu tuir tékniku no abilidade ekipa idaidak nian hodi fó ksolok ba adeptus sira ne’ebé tur nahe aan iha tribun leten hodi hakilar halo rame jogu ne’e.
Fortaleza hala’o jogu ho modelu ofensivu ka ansi halo lalais golu, maibé Blue hala’o jogu ho kalma no hamate tutuir jogu bonitu ne’ebé Fortaleza halo.
Jogadór sira halai ba mai haleu kampo dur bola ba mai husi ain ba ain, fintas ba fintas mai maibé la rezulta golu ruma to’o de’it minutu primeira parte termina. Oportunidade barak Dark Blue hetan maibé la konsege ezekuta ho di’ak, sutu barak avansadu Dark Blue halo maibé barak la kona iha alvu, barak mós guarda rede tenta baku sai.
Ho nune’e iha minutu primeira parte nian ekipa rua tenke rermina ho rezultadu 0-0 hodi deskansa minutu balu hakur fali ba segunda parte hodi hamoris hikas ekipa rua nia luta.
Semo ba segunda parte ekipa rua mantein ho ritmu jogu ne’ebé iha hanesan primeira parte, maibé Blue hatudu nia jogu ne’ebé brillante liu husi avansadu Anuzio Correia iha minutu 40 nia lansa sutu dook ida halo guarda rede Fortaleza la antisipa ho di’ak bola duir aan tama liu ba rede laran muda kedan rezultadu ba 1-0.
Golu ne’e halo kontente tebes jogadór Blue hodi loko-aan iha kampo laran hanoin sira mak manán ona, hodi la haree ba oras ne’ebé sei barak.
Fortaleza kontinua hatudu jogu. Kontinua kalma, hala’o jogu ho pasiensia nune’e bele hamate Blue nia jogu atu hetan oportunidade halo empata jogu ne’e.
Ikus mai esforsu ne’ebé Fortaleza halo la hela de’it hanesan esforsu tanba jógadór Lazaro Ximenes konsege hatudu jogu bonitu hodi responde golu ida iha minutu 67 muda rezultadu ba 1-1. Golu ne’e halo ekipa Blue tenke so’e ona loko-aan hodi esforsu maka’as atu manán jogu ne’e, maibé jogadór Fortaleza la fó fatin to’o minutu normal jogu nian termina ekipa rua tenke fahe pontu ba malu.
Husu rezultadu ne’e lori Dark Blue okupa iha pozisaun ikus liu tabela klasifikasaun grupu D ho pontu ida, pozisaun terseiru okupa husi Jomar FC ho pontu ida, pozisaun segundu Fortaleza ho pontu rua ni primeiru AS Cantada ho pontu tolu.
Jogu ne’e dirije husi árbitru prinsipál Bernardino Mascarinhas, juiz liña Gabriel Pereira, Ricardo Amaral no árbitru rezerva Lucas Santos.
Notísia relevante:Kopa Xanana, Warikoan FC lulun Irmão Timor 2-0
Jornalista: Hortencio Sanchez
Editór: Florencio Miranda Ximenes
