HEADLINE, POLÍTIKA

Xanana: problema bee-moos iha mundu sai ameasa ba pás-estabilidade internasionál

Xanana: problema bee-moos iha mundu sai ameasa ba pás-estabilidade internasionál

Imajen/Media GPM

DILI, 22 Maiu 2024 (TATOLI)— Primeiru-Ministru (PM), Kay Rala Xanana Gusmão, konsidera ema tokon rua resin iha mundu ne’ebé la asesu ba bee-moos, bele sai hanesan ameasa ba situasaun pás no estabilidade internasionál.

Primeiru-Ministru ko’alia asuntu ne’e bainhira sai oradór konvidadu iha painél altu nível: konferénsia internasionál kona-bá Bee tuir Espíritu Bandung, ho tema “Bee no pás”, iha Bali, tersa (21/05/2024).

“Ohin loron, ema tokon rua-resin iha mundu mak la asesu bá bee-moos. Ida-ne’e la’ós de’it nu’udár situasaun emerjénsia umanitária ida, maibé mós sai hanesan ameasa bo’ot ida bá pás no bá estabilidade internasionál,” Primeiru Ministru hateten liuhusi nota ne’ebé Agência TATOLI,I.P asesu kuarta ne’e.

Iha intervensaun hateten, kuaze tinan 70 depois de Konferénsia Bandung nian ne’ebé konsege halibur líder sira hosi Ázia no Áfrika, Timor-Leste mós kontinua inspiradu hosi Espíritu Bandung nian. Espíritu ida-ne’ebé enkarna esperansa no posibilidade bá mundu pós-koloniál ne’ebé nakonu ho dame, igualdade no solidariedade internasionál.

Imajen/Media GPM

“Ohin loron, ita enfrenta dezafiu globál, ita bele hetan benefísiu hosi reflesaun no vizaun hosi líder bo’ot sira ne’ebé partisipa iha Konferénsia Bandung, inklui Nehru, Nasser, Sukarno e Zhou Enlai,” Xanana Gusmão subliña.

Xefe Governu ne’e mós konsidera simeira Bandung Spirit Water demonstra oinsá Indonézia kontinua dezempeña ninia papél importante ida iha lideransa bá asuntu sira globál nian.

Tanba ne’e nia dehan, tenke intende katak, bainhira laiha dezenvolvimentu sustentável ne’ebé inklui bee no saneamentu – labele akontese pás. Bainhira laiha pás maka sei la akontese dezenvolvimentu sustentável.

“Ami-nia país, Timor-Leste, aprende no foti lisaun ida-ne’e nakonu ho sakrifísiu no difísil. Dala ruma bele dehan katak, sivilizasaun ne’e ho nia distánsia oras sia de’it hosi anarkia. Sim, asesu bá bee-moos ne’e importante. Seguransa hídrika hanesan seguransa nasionál. Seguransa hídrika hanesan seguransa internasionál,” Xefe ezekutivu ne’e hatutan.

Tuir Xanana Gusmão, konflitu kona-bá bee iha poténsia bo’ot atu harahun komunidade sira, rejiaun sira no mós nasaun sira. Bainhira bee laiha ekonomia laiha, laiha dezenvolvimentu, no laiha sosiedade.

Nia fó ezemplu kona-bá krize refujiadu sira hosi Europa, ema rihun atus resin mak halai hosi konflitu iha Áfrika no iha Médiu Oriente. Imajina de’it: bainhira akontese kolapsu iha abastesimentu bee nian, sei rezulta dezlokamentu umanu no trajedia ne’ebé bo’ot liu.

TL enfrenta alterasaun klimátika

Daudaun, Timor-Leste mós enfrenta alterasaun klimátika sira ne’ebé hamosu rai maran grave iha mundu tomak no ida-ne’e sai hanesan injustisa grave tanba nasaun industrializadu sira kria situasaun emerjénsia globál ida ne’ebé fó impaktu boot bá nasaun ki’ak no vulnerável sira.

Xanana Gusmão dehan tán, maski nesesidade bee nian bele sai ameasa bá pás, maibé mós asesu bá bee bele sai hanesan arma funu nian. Tanba ne’e, hanesan iha Gaza, abastesimentu alimentu no bee blokeadu totál. Ida-ne’e kria hela dezastre umanitária ida, ne’ebé hamosu sofrimentu no mate.

Ikus liu, Xanana Gusmão subliña katak, ema hotu tenke rekoñese katak asesu bá bee-moos hanesan direitu umanu ida.

Nune’e, Objetivu Dezenvolvimentu Sustentável 6 prevé katak, to’o tinan 2030 tenke iha ona asesu universál no ekitativu bá bee-moos no tenke asessível bá ema hotu-hotu, hanesan mós Objetivu sira Dezenvolvimentu Miléniu antes ne’e, nia dehan, dalaruma mós labele alkansa Objetivu Dezenvolvimentu Sustentável.

Entaun, presiza iha esforsu globál ida sustenta ho verdadeira solidariedade internasionál atu bele alkansa mudansa.

“Ita presiza hetan inspirasaun hosi Espíritu Bandung nian atu ita bele fornese bee no saneamentu bá ema hotu – no atu bele konstrui mundu ida ne’ebé nakonu ho pás,” nia konklui.

Xanana Gusmão espresa sentimentu kontente tanba bele partisipa iha Simeira Bandung Spirit Water no iha Painél Altu Nível: “Bee no Pas” nu’udár onra bo’ot ida atu fahe esperiénsia hamutuk ho líder sira no espesialista estraordinária sira.

Fó atensaun bá problema bee-moos

Iha abertura Simeira Bandung Spirit Water, Sekretáriu Jerál Organizasaun Nasaun Unidas (ONU), António Guterres fó atensaun bá problema bee-moos iha mundu tanba kompetisaun moris ne’ebé la saudável, konsumu bee ne’ebé laiha sentidu, inklui poluisaun ne’ebé lori venenu hodi harahun forsa vitál mundu nian.

Atensaun ne’e, António Guterres fó-sai liu hosi gravasaun vídeo ne’ebé loke iha serimónia abertura World Water Forum bá dala-10, iha Nusa Dua, Bali, Segunda (20/05/2024).

“Tema bá tinan ida-ne’e relevante tebes, bee mak xave bá prosperiedade kolektiva. Maibé, bee iha ohin loron iha hela ameasa nia laran,” Guterres fó atensaun.

Nia mós konsidera bee nu’udár fonte bá vida ne’ebé importante tebes bá saúde públika, ekosistema, no biodiversidade.  La’ós ne’e de’it, mudansa klimátika mós bele hamosu dezastre bá vida umana.

Problema ida-ne’e mós sai hanesan problema mundiál no problema Estadu iha nasaun hotu-hotu nian konsiente ida-ne’e.

Tanba ne’e, tuir nia, World Water Forum bá dala-10 sai hanesan oportunidade krusiál tebes atu halo diskusaun kle’an no buka solusaun hamutuk bá problema bee no saneamentu, hamenus risku dezastre, governasaun, rijidez finanseira no inovasaun.

Ho ida-ne’e, Guterres agradese bá Estadu Indonézia no Konsellu Mundiál Bee nian ne’ebé sai ona uma na’in bá komemorasaun World Water Forum bá dala-10 ne’e.

“ONU fó apoiu bá Indonézia iha esfrosu ida-ne’e. Depois de Konferénsia ONU nian kona-bá Bee iha tinan kotuk, iha fulan jullu tinan ne’e sei lansa estratéjia foun ida bá hotu-hotu kona-bá sistema ONU nian kona-bá bee no saneamentu,” nia informa.

Entretantu, iha serimónia abertura mós Prezidente Repúblika Indonézia (RI), Joko Widodo, fó-sai inisiativa prinsipál foun haat hosi Indonézia nian iha Konferensia internasionál World Water Forum bá dala-10 iha Bali.

Insiativa prinsipál foun haat ne’e mak hanesan, primeiru estebelesimentu loron mundiál Lagoa, segundu estabelesimentu Sentru exelénsia ida iha Ázia-Pasífiku, terseiru maka Jestaun sustentável bee iha país insula kiik sira no kuarta maka levanta projetu sira kona-bá bee nian.

“Bee la’ós de’it hanesan produtu naturál, maibé hanesan produtu kolaborasaun ne’ebé unifika ita, nune’e presiza esforsu koletiva atu bele kuidadu hamutuk produtu ne’e,” Jokowi bolu atensaun.

Notisia relevante:PM Xanana desloka ohin bá Bali hodi partisipa fórum bee mundiál

TATOLI

iklan
iklan

Leave a Reply

iklan
error: Content is protected !!