VIQUEQUE, 23 maiu 2024 (TATOLI)-Autoridade munisípiu Viqueque (AMV) liuhusi Diresaun Planeamentu Dezenvolvimentu Integradu Munisipál (PDIM) loke ona konkursu públiku ba projetu haat ne’ebé empreza lokál hamutuk 42 mak kompete ka sosa ona dokumentu.
“Kona-ba implementasaun projetu ha’at iha tinan 2024, Daudaun ami loke ona konkursu públiku durante fulan ida hodi hetan vensedór ba projetu haat. Antes loke konkursu ami forma uluk ekipa verifíkasaun, avaliasaun no supervizaun (EVAS) no Komisaun Dezenvolvimentu Munisipál (KDM) maka sei halo verifíkasaun ba dokumentu sira husi empreza 42 ne’ebé konkorre ona konkursu, molok ha’u halo aprovasaun”, Prezidente Autoridade Munisípiu Viqueque, Francisco Cruz S. de G Soares, hateten ba Agência Tatoli, iha ninia kna’ar fatin, ohin.
Projetu haat ne’e kompostu husi projetu dahuluk mak konstrusaun edifísiu Sekretáriu Estadu Formasaun Profisional Empregu (SEFOPE), suku Caraubalo, postu Viqueque Vila ba projetu ne’e empreza hamutuk 11 sosa ona dokumentu.
Daruak, konstusaun foun edifísiu Ensinu Báziku Filiál Uaimori, ba projetu referidu empreza 12 maka sosa dokumetu. Datoluk Konstrusaun edifísiu Ensinu Báziku Central (EBC, sigla portugés) 01 Viqueque, suku Caraubalo, postu Viqueque Vila ne’e empreza hamutuk 11 mak sosa ona dokumentu; ikus liu mak projetu loke estrada foun ba fatin lixu, suku Uma-Ki’ik, postu Viqueuqe Vila, empreza ualu mak sosa ona dokumentu.
Projetu hirak ne’e ho baze ba diploma ministerial númeru 19/2013, loron 16 Outubru, artigu 28, nune’e Autoridade Viqueque hakarak konvida empreza lokál ne’ebé pré-kualifikadu, iha PDIM ho kategória B no nia sede iha munisípiu Viqueque.
“Kona-ba orsamentu ba projetu haat referidu seidauk fó sai valór tanba hein empreza manán na’in iha mak bele fo sai”, katak nia.
Ekipa EVAS no KDM mak sei halo verifikasaun ba empreza sira nia-dokumentu inklui foku ba kapasidade empreza hodi jere projetu tanba projetu ba 2024 nian tempu implementasaun limitadu.
“ Ami buka empreza ida-ne’ebé kualidade hodi ezekuta projetu sira, tuir tempu ne’ebé ita tau iha kontratu laran. Nune’e ba emprezaria sira-ne’ebé hakarak partisipa tenke iha komitementu ne’ebé forte entre empreza ho autoridade atu haree projetu. Ba implementasaun projetu haat ne’e sei laiha reapropriasaun (estensaun servisu) signifika katak laiha orsamentu hodi halo estensaun projetu nian ne’ebé projetu tenke hotu iha 2024”, nia afirma.
Maske empreza sira-ne’e sosa ona dokumentu, maibé seidauk subemete fali dokumentu ba aprovizionamentu hodi halo verifikasaun ba empreza sira-nia dokumentu referida.
Entretantu, konkursu referida hahú loke iha loron 06 Maiu no sei taka iha loron 04 Juñu 2024 iha edifísiu autoridade munisípiu Viqueque.
Jornalista : Vitorino Lopes da Costa
Editór : Florêncio Miranda Ximenes
