F-KHK husu MTK konstrui morru protesaun ba kampu aviasaun Naheboruk
VIQUEQUE, 23 maiu 2024 (TATOLI)- Diretór Fundasaun Knu’a Haberan Komunidade (F-KHC), Agustu Pinto, husu Ministru Transporte no Komunikasaun (MTK) ,atu konstrui morru protesaun ba kampu aviasaun Naheboruk iha suku Uma-Uaikarik, Postu Viqueque Vila, Munisípiu Viqueque hodi asegura animál sira labele tama hodi fasilita aviaun emerjensia sira bele tuun ho di’ak.
Tuir nian kondisaun kampu aviasaun Naeboruk ne’e livre animál tama-sai no pior liután mak komunidade balun aproveita kesi animál iha kampu referidu.
“Nune’e, ami sosiadade sivil hakarak husu ba Governu liuhusi Ministru Transporte no Telekomunikasaun (MTK) atu konstrui morru protesaun ruma ba kampu avisaun, nune’e labele difikulta aviaun ki’ik emerjensia ruma mai tula pasiente iha Viqueque”, Agustu Pinto, hateten ba Agência Tatoli, iha postu Viqueque Vila, ohin.
Kazu konkretu ida, Agustu konta, foin lalais ne’e parseiru F-KHK hanesan Catholic Relief Services (CRS) sira mai Viqueque ho aviaun atu tun iha kampu aviasaun Naheboruk derrepente asu la’o korta, nune’e aviaun semo sa’e kuaze dala-rua hanesan ne’e mak foin tu’un.
“Molok aviaun atu tuun ami tenke hale’u tiha kampu hodi hein no duni animál sira atu labele korta aviaun. Tanba ne’e sai hanesan risku ba aviaun sira-ne’ebé atu tuun iha kampu. Ho preokupasaun sira-ne’e maka ami husu hodi konstrui netik rede ruma, hale’u tiha iha kampu atu animál no ema labele la’o iha kampu laran”, nia sujere.
MTK presiza tau importansia ba kampu aviasaun ne’e atu fasilita vizitór sira hakarak ho aviaun mai munisípiu viqueque inklui fasilita transfere pasiente urjente bá nasionál.
MTK mak iha kompeténsia atu konstrui morru
Hatan ba asuntu ne’e, Prezidente Autoridade Munisípiu Viqueque, Francisco Cruz S.de G Soares, rekoñese, kampu aviasuan Naheboruk laiha morru protesaun atu asegura animál sira.
“Ita komunidade nia karreta sira ba tula rai henek mós liuhusi kampu aviasaun. Antes 20 maiu ami koordena ho empreza internasionál COVEC mak ba ajuda hadi’a ona fali ona. Maibé, ameasa seluk morru protesaun laiha hodi difikulta ba aviaun sira-ne’ebé atu mai tula moras grave. Ida-ne’e sai hanesan preokupasaun ita hotu nian, maibé kampu aviasuan ne’e sei kabe ba kompeténsia parte MTK maka sei resposavél nune’e ha’u mós halo kontaktu ba ministériu kompetente hodi buka solusaun ba kampu aviasaun Naheboruk ne’ebé agora laiha morru protesaun”, autoridade ne’e hato’o.
Nune’e, nia husu ba Ministru Transporte no Komunikasaun (MTK) atu tau ba atensaun tanba kampu aviasuan ne’e atu fasilita abitante sira-ne’ebé mak moras emerjénsia sira tenke ba nasionál dalan mak kampu aviasaun.
Jornalista : Vitorino Lopes da Costa
Editór : Florencio Miranda Ximenes
