BAUCAU, HEADLINE, MUNISÍPIU

Pesoál Apoia Suku na’in-234 asina kontratu serbisu ho suku 59 iha Baucau

Pesoál Apoia Suku na’in-234 asina kontratu serbisu ho suku 59 iha Baucau

Pesoál Administrasaun Apoia Suku hamutuk na'in-234 rona esplikasaun antes asina kontratu serbisu ho Autoridade Munisipal Baucau iha Sentru Konvensaun Baucau, kuarta (23/05). Imajen Agência TATOLI/Natalino Belo.

BAUCAU, 23 maiu 2024 (TATOLI) – Funsionáriu Pesoál Serbisu Administrasaun Apoia Suku (PAS) hamutuk na’in-234 kuarta ne’e, asina termu kontratu hodi serbisu ho suku 59 iha munisípiu Baucau.

Sekretáriu Munisipál Asuntu Planeiamentu Dezenvolvimentu Integradu Munisipal, Eduardo Filipe Ximenes, esplika, IX Governu Konstitusionál halo rekrutamentu ba pesoál hirak-ne’e hodi apoia serbisu administrasaun suku diak liután nune’e alkansa ba prosesu podér lokál no desentralizasaun administrativa.

“Ita kontratu pesoál apoiu suku ne’ebé kada suku ema na’in-haat ho idak-idak nia papél halo prestasaun serbisu iha Suku 59,” Sekretáriu Munisipál hateten iha Sentru Konvensaun Baucau (CCB, sigla portugés), kuarta ne’e.

Pesoál Administrasaun Apoia Suku hamutuk na’in-234 asina kontratu serbisu ho Autoridade Munisipal Baucau iha Sentru Konvensaun Baucau, kuarta (23/05). Imajen Agência TATOLI/Natalino Belo.

IX Governu kria dekretu-lei númeru 81/2023, loron-11 Outubru, hodi reforsa mákina suku nian nune’e dezempeña knaar importante iha ezekusaun, administrasaun ho monitorizasaun ba progresu sosiál ho ekonómiku komunidade iha baze.

Husi suku 59 ne’ebé atuál eziste iha Munisipiu Baucau, kada suku sei destaka na’in-haat hanesan Sekretáriu suku, Ofisiál finansa suku, Ofisiál Administrasaun Suku no Ofisiál Asuntu Sosiál Suku ne’ebé ho objetivu atu reforsa mákina suku ho durasaun kontratu fulan-tolu.

Saláriu ba funsionáriu kontratadu termu sertu ne’e variedade hanesan Sekretáriu suku kada fulan sei hetan vensimentu $170, enkuantu na’in-tolu seluk hanesan Ofisiál finansas suku, Ofisiál Administrasaun Suku no Ofisiál Asuntu Sosiál Suku kada fulan $150.

“Sira-ne’e kategória funsionáriu kazuál, tuir regra ita fó kontratu kada fulan depende sira-nia prestasaun serbisu,”Eduardo Filipe akresenta.

Autoridade Munisipál Baucau husu ba funsionáriu hirak-ne’e atu hatudu prestasaun serbisu diak no atetude di’ak liuliu fó atendementu ba komunidade sira iha kada suku.

Ofisiál administrasaun ba Suku Uma-ana-Iku, Postu Venilale, Ana Joanina de Sousa Belo sente kontente no promete sei hatudu prestaun serbisu liuliu fo atendimentu públiku iha nível suku Uma-ana-Iku.

“Ha’u sente kontene tebes, maibe barak mak la liu, tanba-ne’e hau sei servisu hamutuk ho konsellu Suku sira atende komunidade,” Ana Belo hateten.

Pesoál Administrasaun Suku iha Baucau tuir loloos hamutuk na’in-236 maibé na’in-rua mak la marka prezensa hanesan suku Laculiu, postu administrativu Baguia no Uailili, postu Baucau Vila tanba rezigna aan nune’e Autoridade Baucau sei buka komunika ho Ministéiru Administrasaun Estatal (MAE) hodi buka solusaun hanesan kontratu fali supliente husi testa vaga foin lalais ne’e.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!