COVALIMA, 23 maiu (TATOLI)-Servisu Munisipál Obra Públika (SMOP) Covalima, oras ne’e, submete ona proposta ba Ministériu Obra Públika (MOP) kona-ba konstrusaun estrada liga bá merkadu Tuaderek, iha suku Camanasa, postu administrativu Suai, munisípiu Covalima ho distánsia metru 600.
Diretór Servisu Obra Públika Covalima, Sidónio Gusmão informa, tuir relatóriu hosi prosesu levantamentu dadus hosi tékniku sira katak konstrusaun estrada foun ne’e sei kompleta ho valeta hodi okupa rai ho ninia medida luan metru haat, maibé komunidade sira ho voluntariamente entrega sira-nia rai ba Estadu ho luan metru ualu.
“Ami halo kalkulasaun estrada hosi merkadu Tuaderek to’o iha avenida Antóniu Mendonça sai iha prizaun ho metru 600, ita iha planu konstruisaun estrada kompleta ho alkatraun iha tinan 2025,” nia hateten ba TATOLI, iha resintu Administrasaun munisípiu Covalima, kinta ne,e.
Nia dehan tuir estudu viabilidade hosi enjinéiru katak projetu konstrusaun estrada ho distánsia metro 600 ne’e sei gastu orsamentu hamutuk millaun ida dollar amerikanu.
Kona-ba estutu rai ne’ebé maka SMOP Covalima sei utiliza hodi halo konstrusaun estrada bá Tuadarek ne’e, Diretór Terra no Propriedade Covalima, Carlos Caetano, esplika rai ne’ebé maka komunidade oferese ba servisu MOP Covalima ne’e, komunidade nia rai.
“Ita identifika komunidade nia toos no uma hela fatin balun mak afeita bainhira konstrusaun estrada la’o maibé la fó indemizasaun tanba bazea ba asina akordu komunidade hakarak entrega rai ho voluntáriu oinsá bele asesu estrada to’o iha merkadu,” nia hatutan.
Tuir Planu Dezenvolvimentu Integradu Munisipál (PDIM) tinan 2024 nian ne’ebé prevee ninia orsamentu hamutuk $137, 278.18 inkaixa mós planu kontrusaun estrada merkadu Tuaderek.
Jornalista: Celestina Teles
Editór: Agapito dos Santos
