BAUCAU, 23 maiu 2024 (TATOLI) – Tékniku nasionál mekanikazaun husi Ministériu Agrikultura, Pekuária, Peska no Floresta (MAPPF) hadi’a ona tratór hamutuk 14 iha armazein Serbisu Munisipál Agrikultura Baucau.
Xefe Seksaun Mekanizasaun Serbisu Munisipál Agrikultura Baucau, António José Lopes, esplika, tratór hirak-ne’e paradu labele halo operasaun tanba kondisaun aat nune’e ekipa tékniku movel husi nasionál konsege halo manutensaun nune’e atuál bele funsiona hikas hodi fila-rai iha munisípiu Baucau.
“Sira-mai besik semana-ida ona halo manutensaun ba tratór hanesan Kubota ho Emeva hamutuk 14,” Xefe Seksaun Mekanizasaun Serbisu Munisipál Agrikultura Baucau hateten iha Vila Nova, kinta ne’e.
Tratór tipu rua referida aat iha parte bico, kabesa, no sil ne’ebé ekipa tékniku sira konsege troka ho ekipamentu foun no garante bele funsiona fali hodi hatán ba proposta husi komunidade sira bainhira atu fila-rai iha kada suku.
Serbisu Munisipál Agrikultura Baucau rejista tratór hamutuk 18 mak kondisaun aat nune’e atuál 14 mak konsege hadi’a, enkuantu haat seluk seidauk funsiona ekipamentu atu substitui tuan laiha, nunee ekipa sei esforsu atu solusiona iha tempu besik.
“Troka foun hotu tanba sasán rolamentus, sill sira-ne’e lori kedas husi nasionál mai,” António José Lopes akresenta.
Operadór tratór, Alipio Freitas, agradese tanba tratór sira-ne’e funsiona hikas hafoin ekipa tékniku movel sira halo manutensaun tanba aat tinan barak nune’e prezudika serbisu hanesan apoiu fila-rai ba komunidade agrikultór sira.
“Ami-nia tratór sira-ne’e di’ak hotu ona, maibé falta transporte atu kontrola hodi tula mina, xave no ami operadór sira hodi ba servisu iha terrenu,” Alipio Freitas argumenta.
Serbisu Munisipál Agrikultura Baucau antes ne’e iha totál tratór haat mak funsiona husi totál 22 iha munisípiu Baucau.
Jornalista : Natalino Belo
Editór : Evaristo Soares Martins
