Top

Xefe Estadu ho Embaixadór Japaun diskute jestaun bee iha TL

Prezidente Repúblika, José Ramos-Horta. Imajen/Tatoli Egas Cristóvão

DILI, 23 maiu 2024 (TATOLI) –Prezidente Repúblika José Ramos Horta hala’o sorumutu ho reprezentante husi Projetu bee Carrying Water Project (CWP) Global, asosiasaun Japaun nian ida-ne’ebé servisu atu promove kooperasaun entre Japaun no Timor-Leste iha setór bee, ne’ebé parseria ho empreza Kansei husi Japaun hodi ko’alia kona-ba jestaun bee iha Timor-Leste.

“Sorumutu ne’e hala’o hodi aprezenta katak formandu timoroan na’in 20 mak daudaun  simu formasaun téknika ba Jestaun bee iha Japaun iha Kompañia Kansei atu depois remata bele aloka sira iha Fasilidade Sentru Formasaun Profisionál Tibar,” Embaxadór Japaun iha Timor-Leste Tetsuya Kimura hatete ba jornalista sira iha Palásiu Prezidensiál Dili hafoin enkontru ho Xefe Estadu, kinta ne’e.

Diplomata Japaun ne’e dehan, CWP nia objetivu mak atu lansa empreza foun ne’ebé relasiona ho bee iha Timor-Leste liuhusi kolaborasaun ho formandu sira ne’e bainhira sira fila-fali mai Timor-Leste.

“CWP no Kompania Kansei hakarak kontinua kolabora iha kapasitasaun ba Timoroan sira iha área sira hanesan sistema fornesementu bee no drenajen,” Kimura katak.

Nune’e,  iha tempu besik delegasaun formandu nian sei aprezenta ba Prezidente Horta kona-ba sira-nia atividade formasaun setór bee nian no planu sira iha futuru bainhira sira to’o mai Timor-Leste.

Tanba ne’e, Prezidente Repúblika apoiu maka’as ba parseria ne’e no husu ba CWP no nia parseiru sira atu koordena didi’ak ho Governu hodi la’o ba oin.

Formandu Timor-Leste sira sei tuir Forum Mundiál bee nian iha Bali, molok sira fila mai Timor-Leste iha semana hirak oin mai ho abilidade ne’ebé di’ak liu.

CWP fasilita interkámbiu kooperasaun oin-oin entre Japaun no Timor-Leste ne’ebé foka liu ba dezenvolvimentu sustentavel liu husi parseria públiku-privadu. Sira-nia inisiativa ba bee ho empreza Kansei reprezenta komponente xave ida husi kooperasaun bilaterál ida-ne’ebé luan liu.

Notísia relevante:Xefe Governu hakarak Timor-Leste aprende sistema konservasaun bee husi Xina

Jornalista: Hortencio Sanchez

Editór:Florencio Miranda Ximenes 

Publisidade

Leave a Reply

Latest Post

error: Content is protected !!